کابل (پژواک، ۲۴ زمری ۱۴۰۵): اروپايي ټولنه وايي، په افغانستان کې د اسلامي امارت له بیا واکمنېدو راهیسې يې د بشري مرستو، بنسټيزو اړتياوو او د خلکو د معيشت د ملاتړ برخو کې څه باندې دوه میلیارده یورو مرسته کړې ده.
اروپايي ټولنې په هغې خبرپاڼه کې چې پرون (پنجشنبه) یې خپره کړې ویلي چې دغه مرستې د نادولتي موسسو، د ملګرو ملتونو ادارو، سره صلیب، سرې میاشتې او نړۍوال بانک له لارې د روغتیا، زدهکړو، بشري مرستو او نورو بنسټیزو خدمتونو برخو کې لګول شوې دي.
په خبرپاڼه کې راغلي چې اروپايي ټولنې د ښځو د اقتصادي پیاوړتیا، کوچنیو پورونو، کوچنیو کاروبارونو، د اقلیمي بدلونونو پر وړاندې د مبارزې او د افغانستان د مدني ټولنې او رسنیو د ملاتړ برخو کې هم مرستې کړې دي.
یادې ټولنې دغهراز زیاته کړې چې د بېځایه کېدو او کډوالۍ له امله د رامنځته شوو ستونزو د حل په موخه یې له راستنېدونکو او د هغوی له کوربه ټولنو سره هم مرسته کړې ده.
په خبرپاڼه کې د اروپايي ټولنې د بهرني سیاست د مسوولې کایا کالاس له قوله راغلي چې دغه ټولنه به د افغانستان د خلکو ملاتړ ته دوام ورکړي.
