کابل (پژواک، ۲۷ زمری ۱۴۰۵): روسیې وروسته له هغو راپورونو چې اوکراین د روسیې په خاوره کې د لیرې واټن بریدونو لپاره بریتانوي ډرونونه کارولي، بریتانیا ته د «پایلو» خبرداری ورکړی؛ لندن بیا وایي، له اوکراین سره به خپل ملاتړ ته دوام ورکړي.
سکاینیوز د روسیې د سفارت د بیان په حواله راپور ورکړی چې په لندن کې د روسیې سفارت ویلي، د بریتانوي ډرونونو د کارولو راپورونه ښيي چې لندن د اوکراین د جګړې د پراخېدو لاره غوره کوي، په داسې حال کې چې د سولې غوښتنه هم کوي.
سرچینې د سفارت له قوله لیکلي چې د لندن اقدامات به «پایلې» ولري او څومره چې بریتانیا په دې جګړه کې ژوره ښکېلېږي، په هماغه اندازه به یې «بیه» لوړېږي.
د بریتانیا دفاع وزارت د روسیې د دغه خبرداري په غبرګون کې ویلي، هېواد یې له اوکراین سره «اوږه په اوږه» ولاړ دی او کییف ته به هغه تجهیزات برابر کړي چې د روسیې د برید پر وړاندې د ځان دفاع لپاره ورته اړتیا لري.
د بریتانیا دفاع وزارت زیاته کړې چې روسیه باید د بریتانیا د حکومت پر هوډ شک ونه کړي چې په اوکراین او د بریتانیا او د هغې د متحدینو پر وړاندې د روسیې د اقداماتو مقابله کوي.
سکاینیوز د ټایمز ورځپاڼې د راپور په حواله لیکلي چې اوکراین له تېرو شاوخوا شپږو میاشتو راهیسې د روسیې دننه د لیرې واټن په بریدونو کې بریتانوي ډرونونه کارولي دي. ټایمز ویلي، په دغو بریدونو کې د روسیې په یاروسلاول او ولګوګراد کې د تېلو تصفیهخونې هم په نښه شوې دي.
بيبيسي هم د یوې باخبره پوځي سرچینې په حواله ویلي چې بریتانوي ډرونونه د روسیې دننه پر هدفونو د بریدونو لپاره کارول شوي دي.
