کابل (پژواک، ۲۶ تله ۱۴۰۵): د فرانسې په بېلابېلو ښارونو کې د ژوند د لوړو لګښتونو او د ښوونځیو د خراب وضعیت پر ضد د پراخو او تاوتریخجنو لاریونونو پر مهال له پولیسو سره نښتې شوې، هټۍ او عامه ودانۍ زیانمنې شوې او شاوخوا ۱۸۰۰ کسان نیول شوي دي.
د الجزیرې او رویټرز د راپورونو له مخې، د فرانسې د کورنیو چارو وزارت ویلي چې د شنبې په ورځ (د اکتوبر ۱۷مه) د دغه هېواد په کچه شاوخوا ۵۵۰ زره کسانو په لاریونونو کې ګډون کړی و؛ خو د لاریونونو تنظیموونکو د ګډونوالو شمېر ۸۰۰ زره ښودلی دی.
راپورونه زیاتوي چې د یکشنبې په ورځ (د اکتوبر ۱۸مه) هم د پاریس په مرکز کې، په ځانګړي ډول د جمهوریت په میدان کې، د لاریونونو او تاوتریخوالي د پېښو په تړاو د پولیسو حضور زیات شوی و او د اور لګېدو له یوې پېښې وروسته تور لوګي پورته کېدل.
د راپورونو له مخې، په پاریس، مارسی او نورو ښارونو کې ځینې هټۍ لوټ شوې، ودانۍ زیانمنې شوې او له پولیسو سره د نښتو پر مهال له اوښکې بهوونکي ګاز څخه هم کار واخیستل شو. د فرانسې چارواکو ویلي چې د پېښو پر مهال سلګونه پولیس او د بیړنیو خدمتونو کارکوونکي ټپیان شوي دي.
د دغو لاریونونو لومړۍ څپه د سپټمبر په نیمایي کې د پاریس په شمالي څنډو کې له ښوونځیو پیل شوه؛ زدهکوونکو د ښوونکو د کمښت، د درسي ټولګیو د ګڼېګوڼې او د ښوونځیو د خرابو ودانیو پر ضد اعتراضونه وکړل.
وروسته دغه اعتراضونه نورو ښارونو ته وغځېدل او د ښوونکو اتحادیې، کارګرې اتحادیې او د «زېړ واسکټونو» غورځنګ ځینې پلویان هم ورسره یوځای شول. د لاریونوالو غوښتنې د ښوونې او روزنې له ستونزو ورهاخوا د ژوند د لوړو لګښتونو، د سون توکو د بیو، نابرابرۍ او د عامه خدمتونو د کمزوري کېدو موضوعات هم رانغاړي.
د راپورونو له مخې، ټاکل شوې وه چې د فرانسې ولسمشر امانویل مکرون نن د یکشنبې په ورځ د کابینې له بېړنۍ غونډې وروسته ملت ته وینا وکړي.
