کندهار (پژواک ١٩ کب ٩٠): د کندهار په ډنډ ولسوالۍ کې په يوه چاودنه کې يو تن عام وګړى وژل شوى او درې نور ټپيان دي .
د کندهار ولايت مطبوعاتي مسوول زلمي ايوبي ، پژواک خبري اژانس ته وويل چې دغه چاودنه نن مازيګر شاوخوا څلور بجې د يادې ولسوالۍ د ابراهيم خليفه بابا زيارت سيمه کې شوې ده .
هغه وويل چې چاودېدونکي توکي په يو موټرسايکل کې ځاى پرځاى شوي و.
د هغه په وينا يادې سيمې ته خلک د جمعې په ورځ د ميلې لپاره راټولېږي او په نننۍ چاودنه کې وژل شوى او ټپيان هم هلته د ميلې لپاره تللي وو.
د ايوبي په وينا په پېښه کې ټپي شوي کسان د کندهار ميروېس روغتون ته لېږدول شوي دي.
