کندهار ښار ( پژواک ٩ غويى ٩١ ) : د کندهار ولايت مقام مطبوعاتي دفتر وايي، چې ددوو ځانمرګيو بريدوونکيو او د والي دساتونکو ترمنځ جګړه له دواړو لوريو څخه څلور تنه وژل شوي دي.
د ولايت مقام ددفتر رييس پرويز نجيب د غويي په ٩مه، پژواک خبري اژانس ته وويل ، چې له غرمې مخکې په شاوخوا يوولسو بجو دوه ځانمرګي بريد کوونکي، چې په وسلو هم سمبال وو، په ساده جامو کې ولايت مقام ته ننوتل.
هغه زياته کړه ، دوى هڅه کوله، چې د ودانۍ خونو ته ننوځي، خو د والي له شخصي ساتونکو سره په نښته کې راښکېل شول.
نجيب وايي ، چې له نږدې يوه ساعت نښتې وروسته دواړه بريدکوونکي ووژل شول ، خو په دې نښته کې د والي دوه ساتونکي هم وژل شوي او يو تن يې ټپي شوى دى.
د نجيب په وينا، والي توريالى ويسا په ودانۍ کې خوندي دى او هغه ته هېڅ زيان نه دى اوښتى.
ويل کېږي ، چې د ولايت مقام په ودانۍ کې يو شمېر لوړ پوړي چارواکي هم شتون لري.
په دې اړه به نور جزئيات وروسته خپاره شي.
