کندهار ( پژواک ٩ لړم ٩١ ) : د ملي دفاع وزارت وايي ، چې په زابل ولايت کې د وسلوالو طالبانو يو قوماندان له خپلو درېيو ملګرو سره د خپل ماين په چاودنه کې وژل شوى دى.
په سوېل کې د ٢٠٥ اتل قول اردو د مطبوعاتي دفتر لخوا د لړم په ٩مه، پژواک خبري اژانس ته په يوه رالېږل شوې خبرپاڼه کې ويل شوي، چې دا پېښه پرون د زابل په ارغنداب ولسوالۍ کې رامنځته شوې ده.
سرچينې زياته کړې، چې د ارغنداب ولسوالۍ لپاره د وسلوالو طالبانو لخوا ټاکل شوى ولسوال ملا امان الله له خپلو درېيو ملګرو سره پر لويه لاره ماين خښاوه ، چې خپل ماين پرې چاودېدلى دى.
په خبرپاڼه کې راغلي، چې په دې چاودنه کې ملا امان الله له خپلو درېيو ملګرو سره وژل شوى دى.
د ٢٠٥ اتل قول اردو په خبرپاڼه کې ويل شوي، چې د غزني په قره باغ ولسوالۍ کې هم يو طالب د ماين خښولو پر مهال د خپل ماين په چاودنه کې وژل شوى دى.
د ملي دفاع وزارت لخوا په خپره شوې خبرپاڼه کې هم يادې پېښې تاييد شوې دي.
خو وسلوالو طالبانو تر اوسه په دې اړه څه نه دي ويلي.
