کندهار ( پژواک ۲۳ غبرګولی ۹۲ ) : د کندهار ولايت د اقتصاد رئيس محمد رحيم رحيمي له خپل زوى سره يو ځاى په يوه وسله وال بريد کې ټپي شو.
نوموړى، نن د غبرګولي په ۲۳مه، ماښام شا وخوا اته نيمې بجې خپل کور ته روان و، چې د کندهار ښار د دويمې ناحيې اړوند د کارېز بازار په سيمه کې ورباندې بريد وشو.
د کندهار ولايت مقام د مطبوعاتي دفتر مسوول جاوېد فيصل پېښه تائيدوي او وايي، چې د اقتصاد پر رئيس محمد رحيم رحيمي وسله والو موټرسايکل سپرو ډزې کړې او هغه يې له خپل زوى سره يو ځاى ټپي کړى دى.
د نوموړي په وينا، تر پېښې سمدستي وروسته پوليس سيمې ته رسېدلي، د اقتصاد رئيس او د هغه زوى يې د درملنې لپاره روغتون ته لېږدولي دي.
فيصل وايي، بريد کوونکي په تېښته بريالي شوي، خو پوليسو يې د نيول کېدو هڅې پيل کړې دي.
هغه د اقتصاد د رئيس روغتيايي حالت ښه وګاڼه.
بل خوا د کندهار د ميرويس روغتون يو نوکريوال ډاکټر وايي، چې د اقتصاد رئيس او د هغه زوى دواړه تر عملياتو لاندې دي او د مګړى د هغوى د روغتيايي حالت په اړه څه نه شي ويلاى.
د دې پېښې په اړه تر اوسه کومې ډلې څه نه دي ويلي.
په کندهار کې تر اوږدې مودې وروسته دا د خپل ډول لومړنى هدفي بريد دى، چې د ولايت يو چارواکى پکې په نښه کېږي.
تر دې وړاندې وسله والو مخالفينو په ګڼو دغه راز بريدونو کې د قومي مشرانو او مخورو په ګډون دولتي کارکوونکي او نور وژلي او يا ټپيان کړي دي.
