<p>کندهار، مزار شريف (پژواک، ١٨ کب ٩٥): چارواکي وايي چې په کندهار ولايت کې د بهرنيو ځواکونو په هوايي بريد کې ٢٠ وسله وال مخالفين وژل شوي دي.</p>
<p>د کندهار د امنيه قوماندانۍ وياند ضياء دراني د کب په ١٨ مه، پژواک خبري اژانس ته وويل چې دا هوايي بريد نن د نېش او خاکرېز ولسواليو ترمنځ د لام په سيمه کې شوى دى.</p>
<p>هغه زياته کړه چې په دې بريد کې ٢٠ وسله وال مخالفين وژل شوي چې د نېش ولسوالۍ د جګړې لپاره يې تيارى نيوه.</p>
<p>په نېش ولسوالۍ کې له تېرو څو ورځو راهيسې جګړه روانه ده چې له امله يې دواړو لوريو ته مرګ ژوبله اوښتې ده.</p>
<p>د امنيه قوماندانۍ وياند وايي چې په نېش ولسوالۍ کې عمليات په برياليتوب سره روان دي او د وسله والو مخالفينو د پرمختګونو ادعاوې يې رد کړې.</p>
<p>دراني دغه راز وويل چې نن سهار د کندهار ښار په څلورمه ناحيه کې د وسله والو په يوه بريد کې يو پوليس وژل شوى او بل تن يې ټپي دى.</p>
<p>بلخوا ددې ولايت يوې بلې سرچينې پژواک ته وويل چې په خاکرېز ولسوالۍ کې د پوليسو د يوه افسر په کور کې ماشومانو پر لاسي بم لوبې کولې چې پرې چاودېدلى دى.</p>
<p>سرچينې وويل چې په دې چاودنه کې درې ماشومان ټپيان شوي دي.</p>
<p>وسله والو طالبانو تر اوسه په دې اړه څه نه دي ويلي.</p>
<p>د يو بل خبر له مخې د بلخ ولايت پوليسو په بېلا بېلو عملياتو کې لس مجرمين نيولي دي.</p>
<p>د بلخ امنيه قوماندان سيدکمال سادات په يوه خبري غونډه کې وويل چې پنځه تنه يې د موټر تښتونو په تور نيولي دي.</p>
<p>د هغه په وينا، په دې وروستيو کې يو شمېر موټر تښتوونکي له زندانه خوشې شوي چې اوس يې بيا پر دغه جرم لاس پورې کړى دى.</p>
<p>دغه راز سادات وويل چې درې تنه نور يې د لارو شکونو او نورو جرمونو په تور نيولي دي.</p>
<p>دى وايي چې په چهاربولک ولسوالۍ کې يې يوتن د تښتوونکو له منګولو ژغولى، خو په تور يې څوک نه دى نيولى.</p>
