کابل (پژواک، ٢١ غويى ٩٦) : په اسلام اباد کې د افغانستان سفير او د ولسمشر ځانګړى استازى وايي، که پاکستان او هند په ګډه هلې ځلې وکړي، افغانستان کې سوله ممکنه ده.
د افغانستان سفير ډاکټر حضرت عمر زاخېلوال دغه څرګندونې د غويي په ٢١مه، په اسلام اباد کې د افغانستان د سولې په اړه يوه نړيوال کنفرانس ته کړې دي.
هغه زياته کړې:(( له افغانانو مخلص خلک هېڅوک نشته، زموږ پر رول دې څوک شک نه کوي.))
زاخېلوال په افغان سوله کې د پاکستان رول مهم وباله او زياته يې کړه چې له پاکستان پرته هېڅوک په دې برخه کې د (اسانچاري) په توګه رول نه شي ترسره کولى.
هغه وويل، که چېرې پاکستان او هندوستان په ګډه د افغان سولې لپاره هلې ځلې وکړي؛ نو سوله راتللى شي، خو نوموړي په دې توګه کې د سعودي عربستان او ايران پر رول هم ټينګار وکړ.
په سيمه کې د سولې د هلو ځلو په اړه زاخېلوال وويل، پر سولې تر خبرو مخکې بايد د سولې په مانا ځان پوهول په کار دى.
د نوموړي په وينا، په ٢٠٠١ زېږديز کال کې امريکايي ايتلاف څرګندې موخې درلودې، خو د وخت تېرېدلو سره فضا ګډه وډه شوه.
د افغانستان سفير پوښتنه وکړه : (( ايا د ترهګرۍ پر وړاندې جګړه يوه تېروتنه وه.))
زاخېلوال په افغانستان کې د سولې او ثبات لپاره له اخلاص ډکه پر سيمه ييزو همکاريو ټينګار وکړ او ويې ويل چې د سولې لپاره د بېلا بېلو لوريو هلې ځلې شوې، خو لاسته راوړنې يې نه درلودې.
په سيمه کې د داعش د مخ په زياتېدونکو فعاليتونو په اړه د افغانستان سفير وويل، داعش د يوه داړونکي حيوان په توګه د پرمختګ په حال کې دى، دداعش او طالب ترمنځ د واک پر سر جګړه روانه ده.
هغه زياته کړه، د سيمې ځينې هېوادونه د وسله والو طالبانو ملاتړ کوي، خو د کوم هېواد نوم يې وانخيست.
زاخېلوال په افغانستان کې د روان تاوتريخوالي پړه پر پاکستان واچوله او زياته يې کړه : (( موږ نه پوهېږو چې پاکستان په افغانستان کې څه کول غواړي؟))
login or register a new account.
