کابل (پژواک، ١٠ زمرى ٩٦) : په افغانستان کې مېشتو امريکايي ځواکونو ويلي چې يوې چورلکې يې د تخنيکي ستونزو له امله بېړنۍ ناسته کړې او دوه سرتېري يې په کې ټپيان شوي دي.
په کابل کې د امريکايي ځواکونو وياند بېل سالوين د زمري په ١٠مه، پژواک خبري اژانس ته وويل چې داپېښه نن سهار د ننګرهار د اچين ولسوالۍ نږدې سيمه کې رامنځته شوې ده.
هغه زياته کړه، د عملياتو پر مهال د دوى يوې چورلکې د تخنيکي ستونزې له امله بېړنۍ ناسته کړې چې پر ځمکه د چورلکې د لګېدو له امله دوه سرتېري په کې ټپيان شوي دي.
سرچينې ويلي، د امريکايي ځواکونو د ژغورنې ډلې ياد سرتېري خوندي ځاى ته بيولي او تر درملنې لاندې دي.
خو طالب وياند ذبيح الله مجاهد ويلي چې ياده چورلکه د عملياتو پر مهال نسکوره شوې او په کې سپاره ټول امريکايي سرتېري وژل شوي دي.
login or register a new account.
