کابل (پژواک، ٢٩ وږى ٩٦) : د امريکا مشرانو جرګې د ولسمشر ډونالډ ټرمپ له خوا د افغانستان لپاره کانديد شوي سفير جان باس ته د منظورۍ رايه ورکړه.
ولسمشر ټرمپ تېره مياشت جان باس د امريکا د مشرانو جرګې د بهرنيو اړيکو کمېسيون ته د منظورۍ لپاره لېږل و.
د مشرانو جرګې د بهرنيو اړيکو کمېسيون پرون د رايو په اتفاق سره جان باس ته د باور رايه ورکړه او په افغانستان کې د امريکا د سفير په توګه يې منظور کړ.
باس اوسمهال په ترکيه کې د امريکا د سفير په توګه دنده ترسره کوي.
هغه تر دې مخکې په جورجيا، عراق، ايټاليا، بلجيم او چاد هېوادونو کې د سفير او نورو ديپلوماتيکو برخو کې دندې ترسره کړې دي.
د امريکا نوي سفير تېره اوونۍ د مشرانو جرګې د بهرنيو اړيکو کمېسيون ته ويلي وو، دوى نه غواړي چې له افغانستانه په بشپړ وتلو سره دغه هېواد له ګواښونو او خطرونو سره مخ شي.
هغه زياته کړې: ((موږ بايد په افغانستان کې خپلې لاسته راوړنې او هڅې وساتو او دا نه شو برداشت کولى چې له افغانستانه له وتلو وروسته دغه هېواد له خطرونو سره مخ شي.))
د امريکا نوي سفير دغه راز ويلي، دوى نه شي کولى له اعلان شوو تګلارو څخه د خپلې خوښې پايلې ترلاسه کړي.
نوموړي د ولسمشر ټرمپ د تېرې مياشتې وينا ته په اشارې سره ويلي چې امريکا به هېڅکله د شته ننګونو پر وړاندې له مقابلې پر شا نه شي.
د باس په وينا، د خپل هېواد او ولس امنيت دوى ته تر ټولو مهم دى.
هغه زياته کړې: ((که چېرې د سنا له خوا مې د باور رايه ترلاسه کړه؛ نو د افغانستان په اړه د ولسمشر ټرمپ له خوا اعلان شوې تګلاره به تعقيبوم.))
login or register a new account.
