کابل (پژواک، ٨ تله ٩٦) : د پاکستان د پوځ مشر د يوه لوړ پوړي پوځي پلاوي په مشرۍ له افغان چارواکو سره د خبرو اترو لپاره کابل ته راځي.
په کابل کې يوې دولتي سرچينې د تلې په ٨ مه، پژواک خبري اژانس ته وويل چې د پاکستان د پوځ مشر جنرال قمر جاوېد باجوه به له ولسمشر اشرف غني او نورو ملکي او پوځي چارواکو سره د دواړو هېوادونو ترمنځ د اړيکو ښه کولو او سولې په اړه خبرې اترې وکړي.
د سرچينې د معلوماتو له مخې، د پاکستان د پوځ مشر به په افغانستان کې د ناټو او امريکايي ځواکونو له عمومي له قوماندان جنرال جان نېکولسن سره هم ګوري.
د افغانستان او سويلي اسيا په اړه د امريکا د ولسمشر ډونالډ ټرمپ د تګلارې تر اعلان وروسته دا لومړى لوړ پوړى پاکستانى چارواکى دى، چې کابل ته سفر کوي.
د ا مريکا ولسمشر په دې اعلان شوې تګلاره کې ويلي وو چې په پاکستان کې د ترهګرو مرکزونه اوس هم شته او له دې ځايه په افغانستان کې پر افغان او نړيوالو ځواکونو بريدونه کوي.
سرچينې وايي چې د پاکستان دپوځ مشر او افغان چارواکي له طالبانو سره د سولې پر موضوع او په افغانستان کې د پاکستانيو طالبانو ( ټي ټي پي) پر ضد پر اقداماتو هم خبرې اترې کوي.
دا سفر په داسې حال کې کېږي چې تېره اوونۍ د ملګرو ملتونو کلنۍ غونډې ته د وينا پر مهال ولسمشر اشرف غني يو ځل بيا له پاکستان سره د خبرو اترو او ترهګرۍ پر وړاندې د ګډې مبارزې وړانديز کړى و.
خو هغه داهم ويلي چې دا د پاکستان لپاره د خبرو اترو وروستى او مهم چانس دى او که چېرې دا خبرې اترې ناکامۍ شوې، نو د پاکستان په زيان به تمامې شي.
د پاکستان لومړي وزير شاهد خاقان عباسي د ولسمشر په ځواب کې د ملګرو ملتونو غونډې ته ويلي وو چې دوى نه غواړي افغان جګړه خپل هېواد ته ولېږدوي.
د يادونې وړ ده چې پرون د پاکستان د لومړي وزير او د پوځ د مشر په ګډون په اسلام اباد کې د ملي امنيت شورا غونډه شوې وه چې پکې د نورو موضوعاتو تر څنګ پر افغان سولې او له افغانستان سره پر خبرو اترو او اړيکو هم بحث شوى دى.
login or register a new account.
