کابل (پژواک، ١٧ سلواغه ٩٦): ولسمشر اشرف غني د کابل پر ١١١مې فرقې په بريد کې د وظيفوي غفلت له امله د دوو جنرالانو په ګډون اووه چارواکي له دندو ګوښه کړي دي.
د ولسمشر وياند شاه حسين مرتضوي د سلواغې په ١٧مه په خپله ټويټرپاڼه کې لیکلي چې له ياد بريد وروسته ولسمشر د اعلى سرقوماندانۍ په غونډه کې اړوندو ارګانونو ته د دې پېښې د پلټنو امر کړى و.
هغه زياته کړه چې ولسمشر نن د يادې پېښې د څېړنو د راپور تر اورېدو وروسته د دوو جنرالانو په ګډون اووه لوړپوړي چارواکي له دندو ګوښه کړل.
مرتضوي ويلي چې دغه کسان به د پلټنو لپاره عدلي او قضايي ارګانونو ته هم معرفي شي.
له بلې خوا د ملي دفاع وزارت په خبرپاڼه کې چې يوه کاپي يې پژواک خبري اژانس ته را رسېدلې، د ملي اردو اړوند اوو کسانو نومونه په کې اخيستل شوي دي:
۱- د کابل د ۱۱۱فرقې د لومړۍ لوا قوماندان برید جنرال عبدالستار خټګر
۲- د کابل د ۱۱۱مې فرقې د لومړۍ لوا د ارکان رييس برید جنرال غیور
۳- د لومړۍ لوا د دويم کنډک د ارکان رييس او سرپرست جګړن قدرت الله
۴- د لومړۍ لوا د دويم کنډک د اوپراسيون امر جګړن حيات الدین
۵- د لومړۍ لوا د دویم کنډک د استخباراتو امر تورن عبدالقديم
۶- د لومړۍ لوا د دويم کنډک د استخباراتو ضد امر دويم بریدمن محمد شریف
۷- د لومړۍ لوا د دويم کنډک د لومړي ټولي قوماندان تورن عبدالاحد نومونه ياد کړي دي
login or register a new account.
