کابل (پژواک، د چنګاښ لومړۍ نيټه ٩٧): د ناټو سرمنشي وايي، چې طالبان د جګړې په ډګر کې بريا نه شي ترلاسه کولى، که د سولې خبرو اترو ته راشي، ډېرې لاسته راوړنې به ولري.
د ناټو سرمنشي جينز سټولټنبرګ دغه څرګندونې لندن ته د سفر پر مهال د بريتانيا د بهرنيو چارو وزارت لخوا په يوې جوړې شوې غونډې کې کړې دي.
هغه له بريتانيا څخه مننه وکړه، چې په افغانستان کې يې د ناټو د روزنې د ماموريت په چوکاټ کې يې د افغان ځواکونو په روزنه کې مهم رول لوبولى دى.
د ناټو سرمنشي د افغانستان وروستيو حالاتو په اشارې سره وويل، چې د پرمختګونو سره سره هلته اوس هم ستونزې شته دي، چې راوتل ترې اسانه کار نه دى.
سټولټنبرګ وايي، هلته تاوتريخوالى، طالبان، داعش، نور ترهګرې ډلې او فساد شته، دغه راز د حکومت کې اصلاحاتو پر وړاندې هم ګڼ شمېر ستونزې او ننګونې شته دي.
خو هغه وويل، چې په ٢٠١٤ کال کې د ناټو جګړه ييز ماموريت پاى ته ورسېدو او د امنيتي چارو مسووليت افغان ځواکونو ته وسپارل شو، چې دا پخپله يو لوى پرمختګ دى.
د نوموړي په وينا، پخوا چې به طالبانو بريدونه وکړل، نو د ناټو ځواکونو لخوا يې دفاع وشوه، خو اوس دغه کار پخپله افغان ځواکونه کوي.
د ناټو سرمنشي وايي، چې ځايي افغان ځواکونه له دې امله روزل کېږي، څو هغوى پخپله وکولى شي چې له ترهګرو سره مقابله وکړى شي.
سټولټنبرګ د افغان ولسمشر سره د اختر په ورځو کې د اوربند جرئتمندانه اقدام ستاينه وکړه او ويې ويل چې کم تر کمه په ١٧ کلنه جګړه کې د لومړي ځل لپاره اوربند وشو.
خو هغه زياتوي، چې اوس هم د سولې لپاره اوږده لاره پاتې ده ، خو تېر اوربند هيله بخښونکى و او د سولې لپاره کم تر کمه ريښتينې هڅې پيل شوې دي.
هغه زياته کړې، په افغانستان کې د نړيوالو ځواکونو شتون طالبانو ته دا پيغام ورکول دي، چې هغوى د جګړې په ميدان کې نه شي ګټلى .
سټولټنبرګ وايي، چې ناټو به د افغان ځواکونو روزنې او مالي ملاتړ ته ادامه ورکوي.
login or register a new account.
