<p>کابل (پژواک، ٩ سلواغه ٩٧) : افغانستان د روڼتيا نړيوال سازمان په کلني راپورکې د فساد پرضدمبارزه کې په پنځو مقامونو ښه کېدو سره نهم مقام خپل کړى دى.</p>
<p>دروڼتيا نړيوال سازمان له خوا نن د سلواغې په ٩مه، د ٢٠١٨ زېږديز کال کلنى راپور خپور شوى، چې په کې افغانستان ١٧٢مقام خپل کړى، دا په داسې حال کې ده چې افغانستان تېر کال په ١٧٧ مقام کې و.</p>
<p>تر دې مخکې کلونو کې افغانستان، لومړي، دويم، درېيم او څلورم مقامونه خپل کړي وو.</p>
<p>د روڼتيا نړيوال سازمان د نړۍ په ١٨٠ هېوادونو کې په دې اړه سروې او پوښتنې کړې او بيا يې خپل راپور چمتو کړى دى.</p>
<p>د روڼتيا نړيوال سازمان (ټرانسپرنسي انټرنېشنل) له خوا د خپور شوي لېست له مخې، افريقايي هېواد صوماليا د پخوا په څېر يو ځل بيا د نړۍ تر ټولو فاسد هېواد اعلان شوى دى.</p>
<p>د ياد سازمان د ارزونو له مخې، کوم هېواد چې صفر نومرې ترلاسه کړي، هغه د نړۍ تر ټولو مفسد او څوک چې ١٠٠ نومرې واخلي، نو کم مفسد يا پاک هېواد اعلانېږي.</p>
<p>د سرچينې د معلوماتو له مخې، سوريه په دې لېست کې دويم، سوېلي سوډان درېيم، يمن څلورم، شمالي کوريا پنځم، سوډان شپږم، ګيني باسو اووم، اېکواټوريا ګوينيا اتم ، افغانستان نهم او ليبيا لسم مقام خپل کړى دى.</p>
<p>ددغه سازمان د راپور له مخې، ډنمارک لومړى پاک هېواد، نيوزيلينډدويم، فنلينډ درېيم، سينګاپور څلورم، سويډن پنځم، سويس شپږم، ناروې اووم، هالينډ اتم، کاناډا نهم او لوګزمبورګ د نړۍ لسم پاک هېواد اعلان شوى دى.</p>
<p>افغانستان د ياد سازمان له خوا ١٦ نومرې ترلاسه کړې دي په ٢٠١٦ او ٢٠١٧ کال کې افغانستان ١٢ نومرې اخيستې وې.</p>
<p>د سرچينې د معلوماتو له مخې، پاکستان ١٢١ او هندوستان په ٣٨ نومرو ٨٣ م مقام خپل کړى دى.</p>
<p>امريکا ٢٢، بريتانيا ١١ او چين نويم مقام خپل کړى دى.</p>
<p>د روڼتيا نړيواله اداره وايي چې له واک او دندې ناوړه ګټه اخيستنه، پټې معاملې او رشوت اخيستل په نړيواله کچه د فساد لامل شوي او دغو کارونو ټولنو ته ډېر زيان رسولى دى.</p>
<p>د روڼتيا نړيواله اداره چې په ۱۹۹۳ ميلادي کال کې جوړه شوې او مرکز يې په برلين کې دى، د نړۍ په يو سلو اتيا هېوادونو کې دفترونه لري چې د فساد په اړه معلومات راټولوي.</p>
<p>د يادې ادارې مشره ډيليا فيريا روبيو وايي، فساد هغه مهال زياتېږي، چېرته چې ديموکراتيک بنسټونه کمزوري وي.</p>
<p>هغې زياته کړې : (( موږ ليدلي، په ډېرو هېوادونو کې غير ديموکراتيک عناصر او سياستمداران فساد د خپلو شخصي ګـټو لپاره ترسره کوي.))</p>
