<p>کابل (پژواک ٥ مرغومى ٩٨): ولسمشر غني په بدخشان کې ۷۶ بستریز ولایتي روغتون، د خرقې مبارکې جامع جومات او د فيض اباد- بهارک سرک پرانيستي دي.</p>
<p>له ارګ څخه په خپره شوې خبرپاڼه کې راغلي چې ولسمشر محمد اشرف غني د بدخشان ولایت مرکز فیض اباد ښار ته د سفر پر مهال نن له غرمې وروسته د شهید استاد برهان الدین رباني ۷۶ بستریز ولایتي روغتون او د دغه روغتون شپېته بستریزه نسایي ولادي برخه پرانیسته.</p>
<p>سرچينه زياتوي، پردې ولایتي روغتون ۴ میلیونه او ۲۰۰ زره امریکایي ډالر لګښت راغلی چې داخله، جراحي، کوچنیانو او د انتاني ناروغیو برخې په کې فعالیت لري. همداراز د نسایي ولادي پر ۶۰ بستریز ۷۸۰ زره امریکایي ډالر لګښت راغلی او د دولت له بودجې جوړ شوی دی.</p>
<p>دغه راز ولسمشر غني په فیض اباد ښار کې د خرقې مبارکې جامع جومات هم پرانيستى دى.</p>
<p>د ارګ په خبرپاڼه کې راغلي چې د خرقې مبارکې جامع جومات د افغانستان دولت له بودجې د ۳۱ میلیون افغانیو په لګښت په درې پوړونو کې په اساسي ډول جوړ شوی دی.</p>
<p>سرچينه دغه راز وايي، چې نوموړي دغه راز د فیض اباد- بهارک سړک هم پرانیست. د یادې پروژې اوږدوالی ۴۴ کیلومتره دی او تر څلور میلیون ډالرو زیات لګښت پرې راغلی دی.</p>
<p>له بلې خوا له ولسمشر غني د دې ولایت له یو شمېر ښځو سره په کتنه کې د دوی ستونزې، غوښتنې او وړاندیزونه واورېدل.</p>
<p>له ارګ څخه په خپره شوې خبرپاڼه کې راغلي چې په دغې غون ولسمشر دې ته په اشارې چې نن افغان ښځې خپل استازیتوب کوي، وویل، د ویاړ ځای دی چې نن یوه ښځه د ملګرو ملتونو سازمان کې د افغانستان استازیتوب کوي.</p>
<p>هغه زیاته کړه، د افغاني ټولني د درک لپاره واضح اړتیا ده او افغان مېرمنې به مخکې ځي.</p>
<p>ده وویل، د ښځو پر وړاندې تاوتریخوالی په هیڅ راز د منلو نه دی، د ښځو پر وړاندې تاوتریخوالی د عجز نښه ده او موږ د داسې دین پیرویان یو چې زموږ ستر پیغمبر (ص) هېڅکله د ښځو پر وړاندې تاوتریخوالی نه دی کړی.</p>
<p>هغه زیاته کړه، ډېر ژر به د ښځو عالي شورا جوړه او په ښځو پورې اړوندو مسایلو کې به تصامیم ونیسي.</p>
<p>غني علم او فرهنګ ته د بدخشان د ښځو له ژمنې مننه وکړه او ويې ویل، حکومت د ولسوالیو په سطحه د ښځو د اقتصادي ژوند پر ښه والي تمرکز لري.</p>
<p>هغه زیاته کړه، د نړۍ په بازارونو کې د ښځو صنعتي محصولاتو ته بازارموندنه کېږي او د ښځو د صنعتي اتحادیو د جوړېدو په صورت کې به د حکومت په تدارکاتو کې د ښځو محصولاتو ته ۵ سلنه ترجیح په پام کې نیول کېږي.</p>
<p>ولسمشر د ښځو ښوونې او روزنې ته په اشارې وویل، د ښوونې او روزنې په برخه کې به د ډېرو تغییراتو شاهدان اوسو، په راتلونکو دوه کلونو کې شپږ زره ښوونځي جوړېږي او زموږ هڅه داده چې ښوونځي په ټکنالوژۍ مجهز کړو.</p>
<p>په غونډه کې اشرف غني د بدخشان والي ته لارښوونه وکړه چې ژر تر ژره په ټولنیزو چارو کې د ولایت مقام د مرستیالې د تعیین وړاندیز چې یواځې ښځو ته ځانګړی شوی، مرکز ته واستوي.</p>
<p>په خبرپاڼه کې راغلي چې د بدخشان د ښځو چارو رئیسې مېرمن الینا غیاثي او سناتورې ګلالۍ اکبري د نورو په استازیتوب خبرې وکړې او د ښځو پر وړاندې د تاوتریخوالي او جنسیتي تبعیض د مخنیوي، د ولایت مقام د ټولنیزو چارو مرستیالې د ټاکلو، د ښځو چارو ریاست د تشکیل زیاتولو او درېیمي واحدونو د ایجاد، ښځو ته د روزنې او تحصیلي بورسیو د زمینې برابرولو، په بین المللي بازارونو کې د ښځو د محصولاتو د معرفي کولو او ښځو ته د روغتیایي خدمتونو د پاملرنې په برخه کې خپلې غوښتنې او وړاندیزونه د هیواد له جمهور رئیس سره شریک کړل.</p>
