کابل (پژواک، ۱۰ کب ٩٨): د پژواک انلاین نظرپوښتنه ښیي چې ۸۲ سلنه افغانانو د تاوتریخوالې کمولو په اوونۍ کې د ډېر خوندیتوب احساس درلود، خو ۱۸ سلنه نورو بیا په دې اړه نورې بېلابېلې څرګندونې کړې دي.
په قطر کې د طالبانو او امریکا ترمنځ د سولې له شاوخوا یو کال خبرو وروسته له تېرې شنبې شپې تر تېرې شپې په ټول هېواد کې د «تاوتریخوالي د کمښت اوونۍ» وه.
ټاکل شوې چې نن د تاوتریخوالي اونۍ په پای ته رسېدو سره، طالبان او امریکا په قطر کې د سولې تړون لاسلیک کړي او وروسته د سولې بین الافغاني خبرې پیل او په پای کې پر اوربند توافق وشي، څو په افغانستان کې تل پاتې سوله ټینګه شي.
پژواک خبری اژانس د راپور له مخې، د تاوتریخوالي د کمښت په اوونۍ کې وسله وال بریدونه ۹۵ سلنه کم شوي وو.
پژواک خبري اژانس په خپله فېسبوکپاڼه کې له خلکو وپوښتل چې د تاوتریخوالې کمولو اوونۍ څومره د امنیت او خوندیتوب احساس کاوه.
په شاوخوا پنځو ساعتونو کې دې پوښتنې ته ۳۶۰۰ کسانو ځواب ویلی دی.
د ځواب ویونکو ۸۲ سلنه ویلي چې د تاوتریخوالیو د کموالې په اونۍ کې یې ډېر د خوندیتوب احساس درلود.
عبیدالله عبید لیکلي: «الحمدالله د اورکم او خوشحالې اوږنۍ وه چې په کامیابۍ پای ته ورسېده او الله یې دې د تل پاتې سولې سبب و ګرځوي.»
ساحل ملاخېل هم بیا لیکلي: «الحمدالله اورکم په ټول هېواد کې د خوشحالۍ فضا رامنځته کړې وه، خدای دې په عمومې اوربند بدل کړي.»
خو صدیق خاکسار لیکلي: «چندان خوندور خو نه وه، باید طالبانو په ښارونو کې او حکومت چارواکو په کلیو کې په ډاډه زړه تګ راتګ کړی وای.»
رسالت قیومي لیکلي: «په کابل کې د امنیت احساس کول سخت کار دی.»
عالم شینواري هم لیکي: «د تاوتریخوالي کموالي په اوونۍ کې ۱۹ میندې بورې شوې دي او په ټول کال کې ۱۹ خارجیان نه دي وژل شوي.»
login or register a new account.
