کابل (پژواک، ۱۷ کب ٩٨): د کابل مسوولين وايي، د دې ولايت په قره باغ ولسوالۍ کې د امنيتي ځواکونو پر رينجر موټر بريد شوى چې په يو تن په کې وژل شوى او درې نور ټپيان دي.
د قره باغ ولسوال خواجه محمد حنيف صديقي، پژواک خبري اژانس ته وويل چې نن له غرمې وروسته په ٣:٤٠ بجو د قره باغ په قلعه نصرو سيمه کې وسله والو د امنيتي ځواکونو پر يوه رينجر وسله وال بريد کړى دى.
ده زياته کړه، په دې پېښه کې د يوه ټولي د قومندان يو ساتونکى پوليس وژل شوى، هغه او دوه نور ساتونکي يې ژوبل دي.
د ده په وينا، دغه قومندان دوه ورځې مخکې نوى په همدې دنده ګومارل شوى و.
د پېښې مسووليت تراوسه پورې چا په غاړه نه دى اخيستى.
login or register a new account.
