کابل (پژواک، ۲۶ وری ۹۹) : د ناټو سرمنشي له طالبانو غوښتي دي چې د بین الافغاني مذاکراتو لپاره دې بریدونه ودري او تاوتریخوالي کم کړي.
د ناټو سرمنشي جینز سټولټنبرګ دغه څرګندونې ددغه سازمان ددفاع وزیرانو له غونډې مخکې د ویډیو له لارې یوه خبري کنفرانس ته وکړې.
هغه زیاته کړه چې سبا د ناټو سازمان د ۳۰ غړو هیوادونو ددفاع وزیرانو ویډیویي غونډه د بلجیم په پلازمینه بروکسل کې جوړيږي چې پکې تر ډیره بریده د کرونا پر ضد مبارزې، په عراق او افغانستان کې د ناټو پر ماموریتونو او یو شمیر نورو موضوعاتو خبرې کیږي.
نوموړي د یوې پوښتنې په ځواب کې وویل چې په دې وروستیو کې د طالبانو بریدونه زیات شوي چې اندیښمنوونکي دي.
هغه پر طالبانو غږ وکړ چې بریدونه بند او له امریکا سره لاسلیک کړي تړون په بشپړه توګه عملي کړي.
د ناټوسرمنشي دغه راز پر طالبانو ټینګار کړی چې تاوتریخوالی کم کړي ، ځکه دده په وینا، بین الافغاني مذاکراتو لپاره دا کار مهم دی.
سټولټنبرګ ویلي چې دوی د بین الافغاني مذاکراتو پیلیدو لپاره د ټولو هڅو هرکلی کوي او د افغان حکومت یې ستاینه وکړه چې یو ټولشموله مرکچي پلاوی یې اعلان کړی دی.
نوموړي دغه راز د افغان حکومت او طالبانو لخوا د بندیانو خوشې کول هم ښه اقدام وباله او له ټولو خواوو یې وغوښتل چې د سولې په تړاو خپلې ژمنې عملي کړي.
هغه په ځانګړې توګه د تاوتریخوالي پر کمولو ټینګار وکړ او ویې ویل چې دا بین الافغاني مذاکراتو لاره هواروي.
سټولټنبرګ دغه راز قطر ته د ناټو د قوماندان جنرال میلر سفر او هلته طالبانو سره د لیدنو کتنو هرکلی کړی دی .
نوموړي په ډاګه کړې، ناټو به افغان ځواکونو مالي ملاتړ او پوځي ملاتړ ته ادامه ورکوي .
login or register a new account.
