د ناروې کډوالو شورا مشر: موږ حکومت نه، بلکې افغانستان په رسمیت پېژنو

[restrict paid="true"]

اټلانټا (پژواک، ۵ غبرګولی ۱۴۰۲): د ناروې کډوالو شورا مشر یان اېګلنډ په افغانستان کې د ټول‌ګډونه حکومت پر جوړېدو د ټینګار ترڅنګ، د اروپايي ټولنې له سفیرانو غوښتي چې بېرته افغانستان ته ستانه شي.

نوموړی چې کابل ته په سفر تللی، دا څرګندونې د غبرګولي په پنځمه له طلوع نیوز سره په یوه ځانګړې مرکه کې کړې دي.

هغه زیاته کړې، په ډیپلوماسۍ کې رژیمونه او حکومتونه په رسمیت نه پېژندل کېږي، بلکې هېوادونه په رسمیت پېژندل کېږي او دغه شورا افغانستان په رسمیت پېژني.

اېګلنډ ویلي: «زموږ هېواد (ناورې) افغانستان له ډېر پخوا راهیسې په رسمیت پېژندلی دی. رژیمونه او حکومتونه ځي او راځي، خو موږ افغانستان په رسمیت پېژندلی دی. زموږ سفیر باید ژر تر ژره افغانستان ته راستون شي او زه د دغه کار او دغه‌راز د نورو اروپایي سفیرانو د راستنېدو لپاره لابي کوم. خوښ یم چې اروپایي ټولنه له مخکې دلته حضور لري، هغوی باید راشي او له طالب چارواکو سره تعامل وکړي.»

نوموړی همداراز وایي، اوسني وضعیت ته په پام سره، افغانستان یوې سیاسي هوکړې ته اړتیا لري او له همدې امله اړتیا ده، څو یو ټول‌ګډون حکومت جوړ شي.

د هغه په باور، په کندهار کې د اسلامي امارت له ځینو چارواکو سره په لیدنو کې یې درک کړې چې په نږدې راتلونکي کې به د اسلامي امارت له لوري د یوې نوې کړنلارې په صادرېدو سره، په افغانستان کې د ښځو پر زده‌کړو او کار لګول شوي بندیزونه لرې شي.

د ناروې کډوالو شورا مشر یان اېګلنډ وايي: «هغوی ماته دوه خبرې وکړې، لومړۍ دا چې د یوه لارښود له لارې به د نجونو پر زده‌کړو او بشري بنسټونو کې د ښځو پر کار لګول شوی بندیز لرې شي او دغه لارښود تقریباً بشپړ شوی دی؛ نو هیله‌من یو چې دغه لارښود ډېر ژر وګورو، څو وکړای شو په ټول افغانستان کې له خپلو ښځينه همکارانو سره په ګډه خپل کارونه بېرته پېل کړو او نجونې وکړای شي ښوونځیو او پوهنتونونو ته ولاړې شي.»

هغه په افغانستان کې بشري مرستو ته په نغوتې سره وایي، یو شمېر مرستندویه بنسټونو د نجونو پر زده‌کړو او د ښځو پر کار د بندیز له امله خپلې مرستې سیاسي کړې دي.

اېګلنډ وایي: «فکر کوم دا خبره موضوع سیاسي کوي، کله چې هغوی وایي، طالبان او د هغوی کارونه یې نه خوښېږي، ځکه هغوی د ښځو پر وړاندې تبعیض کوي، ښځې له زده‌کړو او کاره منع کوي؛ نو باید له افغانستانه پيسې وایستل شي. فکر کوم چې دغه کار د مرستو سیاسي کول دي، ځکه مرستې د ولس او بې‌وزلو خلکو لپاره دي. هغوی باید د طالبانو له مشرتابه سره تعامل وکړي او لکه څنګه چې موږ وایو، هغوی ته ووایي چې له دې هرڅه سره مخالف دي. د مرستو تر بندولو له بې‌وزلو سره مرسته غوره تعامل دی.»

د هغه په وینا، اوس‌مهال په افغانستان کې ۲۸ میلیون وګړي بشري مرستو ته اړتیا لري.

[/restrict]