<p style="text-align: justify;">هرات (پژواک، ۱۷ وږی ۱۴۰۴): د هرات یو اوسېدونکی نذیراحمد چې اووه کاله مخکې یې په دغه ولایت کې د یوه کوچني فارم په جوړولو سره د اوښمرغانو (شترمرغ) روزنې ته مخه کړې او اوس یې کاروبار یو څه ښه شوی وايي، که حکومت یې ملاتړ وکړي، کولای شي خپل دغه کار لا پراخ کړي.</p>
<p style="text-align: justify;">نذیراحمد په ۱۳۹۷ کال کې په لږې پانګونې (۱۰۰ زره افغانۍ) او سترې هیلې سره پرېکړه وکړه چې د اوښمرغانو روزنه پيل کړي. هغه چې ژوند یې د دې لویو مرغانو له روزنې سره تړلی، اوس د هېواد په لوېدیځ کې د دغه نوي صنعت له بریالیو څېرو ګڼل کېږي.</p>
<p style="text-align: justify;">نوموړی چې په خپل فارم کې ګرځېده، د پژواک خبریال ته وویل: «د اوښمرغه روزنه وخت ته اړتیا لري، خو عاید یې بیا ښه دي.»</p>
<p style="text-align: justify;">هغه وایي، اوس په فارم کې ۲۰ اوښمرغان دي او د چچوڼو تولید یې چې په کال کې تر ۴۰۰ پورې رسېږي، د نوو فارمونو لپاره کابل او مزارشریف ولایتونو ته لېږي. د هغه په وینا، ډېری پېرېدونکي یې هم د کابل او د هېواد د شمالي ولایتونو دي.</p>
<p style="text-align: justify;">نذیراحمد وایي، د اوښمرغه د یوه چچوڼي بیه تر اووه زره افغانیو او د یوه بالغ اوښمرغ بیه تر سل زره افغانیو رسېږي چې دا په هرات کې د دغه صنعت د اقتصادي ارزښت ښکارندویي کوي.</p>
<p style="text-align: justify;">د هغه په خبره، د اوښمرغانو روزنې فارمونه پرلهپسې پاملرنې او مدیریت ته اړتیا لري او شپږ کسان چې خپله هم ورسره دی، په بېلابېلو شفټونو کې په کار بوخت دي.</p>
<p style="text-align: justify;">هغه اوښمرغان چې نذیراحمد یې روزي، یوازې لوی او عجیبه مرغان نه دي، بلکې د عاید، دندې او ان د هیلې یوه سرچینه هم ده.</p>
<p style="text-align: justify;">نوموړي د اوښمرغه د خوراکي او اقتصادي ارزښت په اړه وویل: «د اوښمرغه غوښه د کلسټرول او غوړ نه درلودو له امله ډېره ګټوره ده او هر بالغ اوښمرغه نږدې سل کیلوګرام وزن لري چې لسګونه کیلوګرامه خالصه غوښه ترې لاس ته راځي.</p>
<p style="text-align: justify;">هغه پر دې باور دی چې دغه صنعت هم اسان دی او هم ډېره ګټه لري. هغه چې له حکومت د ملاتړ په تمه ده وویل: «که ملاتړ مې وشي، کولای شم په ټول هرات کې دغه صنعت ته پراختیا ورکړم.»</p>
<p style="text-align: justify;">بشیراحمد یو تجربهلرونکی کس چې له لومړیو ورځو له نذیر سره په فارم کې پر کار بوخت دی، پژواک ته وویل چې د چوزې یا چچوڼو ایستلو هره دوره له ۴۰ تر ۴۵ ورځو وخت نیسي.</p>
<p style="text-align: justify;">هغه د امکاناتو له کمښته شکایت کوي او باور لري چې که لا ښه وسایل او دستګاوې ورته برابر شي، د تولید ظرفیت به یې څو برابره ډېر شي.</p>
<p style="text-align: justify;">بلخوا، د هرات د کرنې، اوبولګولو او مالدارۍ ریاست مسوولین هم له دغه صنعته د ملاتړ لپاره له ځینو پروګرامونو یادونه کوي.</p>
<p style="text-align: justify;">د هرات د کرنې ریاست د مالدارۍ امر محمدعمر قاصد وايي چې پخوا په هرات کې د اوښمرغانو درې فارمونه فعال وو، خو اوس یوازې یو فعال دی.</p>
<p style="text-align: justify;">هغه زیاتوي، یاد ریاست د دغه صنعت د بیاپراختیا په هڅه کې دی چې تر اوسه د اوښمرغانو د روزنې ترویج لپاره مالدارانو ته د پوهاوي ورکولو څو سیمینارونه هم جوړ شوي دي.</p>
<p style="text-align: justify;">د هغه په وینا، د کرنې ریاست پلان لري چې یادو پروګرامونو ته دوام ورکړي څو خلک د اوښمرغانو له اقتصادي او خوراکي ارزښت سره لا اشنا شي.</p>
