کابل (پژواک) – د افغانستان د عدلیې وزارت وایي چې د اسلامي امارت د مشر د حکم پر بنسټ، په مرکز او ولایتونو کې د ماشومانو د اصلاح او روزنې مرکزونو (دارالتأدیب) مسوولیت د زندانونو چارو د تنظیم له ادارې دغه وزارت ته لېږدول شوی او د دغو مرکزونو د رسمي لېږد بهیر پیل شوی دی.
دغه وزارت د یوې خبرپاڼې په خپرولو ویلي چې د یادو مرکزونو د لېږد لپاره ټاکل شوي پلاوي د یکشنبې په ورځ (د جماديالاول ۱۳مه) د عدلیې وزارت د مسلکي مرستیال شیخالحدیث مولوي عبدالکریم حیدر په مشرۍ خپله لومړنۍ ناسته ترسره کړې ده.
د سرچینې په خبره، په دې ناسته کې د زندانونو چارو د تنظیم ادارې استازو، د عدلیې وزارت د اړوندو څانګو مسؤولینو او د مالیې وزارت او چارو ادارې استازو ګډون کړی و.
په خبرپاڼه کې راغلي چې په دې ناسته کې د اسلامي امارت د مشر د ۱۴۴۸ هجري قمري کال د جماديالاولی د اوومې نېټې د ۱۴مې ګڼې حکم د پلي کېدو څرنګوالي په اړه بحث او خبرې شوې دي؛ دغه حکم په مرکز او ولایتونو کې عدلیې وزارت ته د ماشومانو د اصلاح او روزنې مرکزونو د لېږد په اړه دی.
د خبرپاڼې له مخې، په دې ناسته کې د عدلیې وزارت د کارکوونکو چارو د رییس مفتي رحمتالله حلیم په مشرۍ او د زندانونو چارو د تنظیم ادارې، مالیې وزارت او چارو ادارې د استازو په ګډون یوه تخنیکي کمېټه جوړه شوې ده.
دغه کمېټه موظفه شوې چې د یادو مرکزونو تشکیل، اسناد، بودجه، دفترونه، منقول او غیرمنقول ملکیتونه، وسایط، تجهیزات، تأسیسات او نور امکانات وپېژني او تثبیت یې کړي او راپور یې ټاکل شوي پلاوي ته وړاندې کړي.
د عدلیې وزارت زیاته کړې چې د اسلامي امارت د مشر د حکم پر بنسټ، له دې وروسته به په ټول هېواد کې د ماشومانو د اصلاح او روزنې مرکزونو د مدیریت مسؤولیت د دغه وزارت پر غاړه وي.
