احمد صهیب حسرت

د ملګرو ملتونو پراختیايي ادارې(UNDP)  مشر وایي، افغانستان له ننګونو سره سره په ناهیلي حالت کې نه دی او دغه اداره یې هم د اقتصادي پیاوړتیا لپاره کار کوي.

د افغانستان د کانونو او پټرولیم وزارت وایي، په اوو ورځو کې یې څه باندې ۴۸۵ میلیونه افغانۍ عواید راټول کړي دي.

د ملګرو ملتونو سرمنشي وایي، د کابل په کرکټ لوبغالي کې هغه چاودنه غندي چې ۱۹ کسان په کې وژل شوي، خو امنیه قومانداني وایي چې په دې چاودنه کې یوازې دوو کسانو خپل ژوند له لاسه ورکړی دی.

د ازبکستان د چارو ادارې مشر د افغانستان د بهرنیو چارو له سرپرست وزیر سره په لیدنه کې ویلي چې د ازبکستان، افغانستان او پاکستان ترمنځ د رېل‌پټلۍ د سروې چارې به روانه اونۍ په افغانستان کې پيل شي.

په کابل کې د چاپان سفیر د ریاست‌الوزرا له مرستیال مولوي عبدالسلام حنفي سره په لیدنه کې ویلي، په افغانستان کې سوله او ثبات د سیمې او نړۍ په ګټه دي او له افغانانو سره به ګډ کار وکړي څو دغه هېواد دایمي سولې او ثبات ته ورسېږي.

د افغانستان د مخابراتو او معلوماتي ټکنالوجۍ وزارت د مخابراتي شرکتونو له مسوولینو سره د مکالماتي او انټرنټي بېو پر ټیټوالي خبرې کړې دي.

کورنیو چارو وزارت وایي چې دوه کسان یې د «مجاهدینو» له نوم نه په استفادې د سرو زرو او پیسو د غلا په تور د کابل په بګرامیو ولسوالۍ کې نیولي دي.

د افغانستان د شطرنج ملي لوبډله نړۍوالو لوبو کې د ګډون په موخه نن هندوستان ته ولاړه او دغه سیالۍ به نن د هند په چینای ښار کې د ۱۸۸ هېوادونو په ګډون ترسره شي.

د پاکستان د انرژۍ وزارت مرستیال وایي: «چمتو یو له افغان پانګه‌والو سره په ګډه افغانستان کې د برېښنا پر تولید پانګونه وکړو او راتلونکي کې د ډبرو سکرو پر ځای له افغانستانه برېښنا وارده کړو.»

کابینې یوه پلاوي ته دنده سپارلې چې د کمال‌خان او بخش‌اباد بندونو پاتې کارونه وڅېړي او د بشپړېدو لپاره یې جزئیات د کابینې راتلونکې غونډې ته وړاندې کړي.

یوه چینایي شرکت په افغانستان کې په لوړه بیه د کانونو د استخراج لپاره تیاری ښودلی او ویلي یې دي چې له دې سره به د ښه ګاونډيتوب ترڅنګ د بې‌بدله مرستو لړۍ هم دوام ولري.