په کابل کې دوه کسان د «مجاهدینو» له نومه په استفادې د غلا په تور نیول شوي

<p style="text-align: justify;">کابل (پژواک، ۵ زمری ۱۴۰۱): کورنیو چارو وزارت وایي چې دوه کسان یې د «مجاهدینو» له نوم نه په استفادې د سرو زرو او پیسو د غلا په تور د کابل په بګرامیو ولسوالۍ کې نیولي دي.</p>

<p style="text-align: justify;">کورنیو چارو وزارت په خپله ټويټرپاڼه د یاد مطلب ترڅنګ یو ویډیویي کلیپ هم خپور کړی دی.</p>

<p style="text-align: justify;">په دغه کلیپ کې یو مسوول وایي چې دغه دوه کسان څو ورځې مخکې د بګرامیو ولسوالۍ اړوند یوه کور ته ورغلي او ځانونه یې ورته د استخباراتو کارمندان معرفي کړي وو؛ له یاد کوره یې پیسې او سره زر غلا کړي وو.</p>

<p style="text-align: justify;">هغه زیاتوي چې نیول شوو کسانو پر خپل جرم اعتراف کړی دی.</p>

<p style="text-align: justify;">په دغه کلیپ کې یو نیول شوی کس وایي: «یوه کور ته ورغلو، ورته مو وویل چې موږ مجاهدین یو او دلته داعش ځای پر ځای شوي، کور تلاشي کوو، کله چې مو تلاشي وکړه، د هغوی پیسې او سره زر مو واخیستل.»</p>

<p style="text-align: justify;">د یادې پېښې زیانمن هم په دې ویډیو کې ویلي چې دغو وسله والو یې لاسونه وتړل او یوه کیلو زیورات، درې سوه زره افغانۍ او درې سوه ډالر یې ترې وړي دي.</p>