کابل (پژواک ٣ ليندۍ ٩٠) : کوچيانو له ولسمشر حامد کرزي وغوښتل، چې په دولت کې تحصيل کړيو کوچيانو ته دندې ورکړي.
د ولسمشر د ويندوى له دفتر څخه نن د (ليندۍ ٣) پژواک خبري اژانس ته په رالېږل شوي خبرپاڼه کې راغلي، چې د کوچيانو استازو نن له غرمې مخکې له ولسمشر کرزي سره په ليدنه کې په دولتي ادارو کې د دندو د ورکولو غوښتنه وکړه.
په خبرپاڼه کې ويل شوي، چې د کوچيانو په استازيتوب الوک ککوزي وويل، چې کوچيانو ته دې د پوهنې، روغتيا او استوګنځايونو په اړه د دولت پاملرنه وکړي.
الوک زياته کړه، چې په دوديزه لويه جرګه کې ملي مشارکت په پوره ډول په نظر کې نېول شوى و او د کوچيانو سلو استازو په کې ګډون کړى هم و.
همداراز کوچي مشرانو د دوی ستونزو ته د ژر رسېدلو په موخه په ولايتي شورا ګانو کې د کوچيانو د غړيتوب او همدا راز د زونونو په کچه په ټاکنو کې د دوی لپاره د سهم د ورکولو وړانديز وکړ.
د سرچينې په وينا، ولسمشر کرزي د کوچيانو د استازو د غوښتنو او وړانديزونو له اورېدو وروسته وويل، چې حکومت دنده لري، تر څو د افغانستان په ادارو کې تحصيل کړيو کوچيانو ته د دندو د پيدا کولو په برخه کې اړين اقدامات تر سره کړي.
ولسمشر د دوديزې لويې جرګې په اړه وويل، چې په دې جرګه کې له ټول افغانستان څخه د خلکو استازيتوب په ښه توګه په پام کې نيول شوی و او يوه ريښتينې استازې جرګه وه.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن