غزني ښار(پژواک، ٧ سلواغه ۹۱): د غزني ولايت په اندړو ولسوالۍ کې د نښتې پرمهال د وسلوالو طالبانو د يوه قوماندان په ګډون پنځه تنه وژل شوي، خو طالبان د اتو پوليسو د وژلو دعوه کوي.
د غزني امنيه قوماندان مل پاسوال زړور زاهد پژواک خبري اژانس ته وويل، نن سهار د اندړو ولسوالۍ د سردار کلا په سيمه کې د وسلوالو طالبانو او ملي پوليسو او سيمه ييزو پوليسو ترمنځ نښته وشوه.
ده زياته کړه، په دې پېښه کې د وسلوالو طالبانو يو سيمه ييز قوماندان له څلورو نورو تنو سره وژل شوى دى.
نوموړي ددغه قوماندان نوم و نه ښود .
خو وسلوال طالبان په ياده سيمه کې د اتو پوليسو د وژلو دعوه کوي.
د وسلوالو طالبانو وياند ذبيح الله مجاهد پژواک ته وويل، د يادې سيمې پر يوې امنيتي پوستې او کاروان يې بريد کړى، چې په ترڅ کې يې اته پوليس وژلي او شپږ نور ټپيان کړي دي.
ده په دې پېښه کې د خپل يوه ملګري وژل منلي دي. خو امنيتي چارواکي د مجاهد ادعا نه مني.
