کابل (پژواک ٨ غبرګولى ٩٣): ولسمشر حامد کرزي په خپلې راډيويي وينا کې له ټولو هېوادوالو غوښتي، چې د ولسمشرۍ په دويم پړاو ټاکنو کې پراخه ګډون وکړي او د خپلې خوښې نوماند ته رايه ورکړي.
ولسمشر وويل، چې د وري مياشتې د شپاړسمې نېټې د ولسمشرۍ او ولايتي شوراګانو په ټاکنو کې د پراخه ګډون له امله، افغانستان د نړۍ په خلکو کې عزت او وياړ ترلاسه کړ.
ولسمشر کرزي زياته کړه: “دغه عزت او وياړ يې له دې امله تر لاسه کړ، چې تاسو د افغانستان خلکو، زموږ ګرانو هېوادوالو، له ډېرو سختيو او ګواښونو ترڅنګ د رايې ورکونې مرکزونو ته ولاړئ او افغانسان مو بريالى کړ. افغانستان مو د يوه ولسواک هېواد په توګه چې دا خپل حق او واک بولي او هغه د هېواد د خير لپاره کاروي، خلکو ته ور وپېژانده.”
هغه زياته کړه، دى ډاډ لري چې افغانان به د ولسمشرۍ په دويم پړاو ټاکنو کې، چې ډاکټر اشرف غني او ډاکټر عبدالله په کې مخکښ کانديدان دي، يو ځل بيا د رايې ورکونې مرکزونو ته ولاړ شي او د خپلې خوښې وړ کانديد ته به رايه ورکړي.
ولسمشر، په ټاکنو کې د رايې ورکړه د افغانانو په برياليتوب او ثبات کې مهمه وبلله او د افغانستان خلکو ته يې په خپل پيغام کې وويل: “په همدې ترتيب سره افغانستان د ثبات، ښه امنيت او د ډيموکراسۍ د پلي کولو لپاره څو قدمه پر مخ وړئ.”
نوموړي زياته کړه: “زما هيله داده، چې زموږ ملت او زموږ خلک د غبرګولي ٢٤ مه د افغانستان د برياليتوب، د روښانه راتلونکي پر لوري د حرکت او د سولې او ثبات د نېکمرغۍ ورځ وبولي. د رايې د ورکړې لپاره دې بهر راووځي او د خپلې خوښې وړ کانديد ته دې رايه ورکړي او افغانستان د کاميابه راتلونکي پر لوري بوځي.”
ولسمشر د خپلې بيانيې په پاى کې، د هېواد د روښانه راتلونکي لپاره هيله څرګنده کړې او ويلي يې دي: “له نن څخه د پرمختللي، له نن څخه د غښتلي افغانستان او زموږ د ماشومانو د روښانه سبا په هيله له کورونو د باندې راوځو او رايه ورکوو، الله پاک دې افغانستان بريالى لري. سرلوړي دې وي د افغانستان خلک او همېشه دې زموږ ګران هېواد ژوندى وي.”
ټاکل شوې، د ولسمشرۍ دويم پړاو ټاکنې د غبرګولي مياشتې په ٢٤ مه تر سره شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن