اسعد اباد ( پژواک، ٢٤ وږى ٩٣ ) : په کونړ ولايت کې ديوې ترافيکي پېښې له امله څلور تنه مړه شوي دي.
د کونړ ولايت امنيه قوماندان مل پاسوال عبدالحبيب سيدخېل د وږي په ٢٤مه، پژواک خبري اژانس ته وويل ، چې دا پېښه نن سهار د سرکاڼو ولسوالۍ په مرکز کې رامنځته شوې ده.
هغه زياته کړه، په ياده سيمه کې يو سراچه موټر له مازدا موټر سره جنګېدلى، چې له امله يې د دوو وروڼو په ګډون څلور تنه مړه او يو تن ټپي شوى دى.
نوموړي ددې ترافيکي پېښې لامل بې احتياطي وباله.
د يوه بل خبر له مخې، د پاکستانيو ځواکونو له خوا پر دې ولايت ٣٣ نور توغندي توغول شوي دي.
امنيه قوماندان وايي، چې لس توغندي د شيګل ولسوالۍ پر شلطن درې او پاتې نور يې ددانګام ولسوالۍ پر بېلا بېلو سيمو لګېدلي دي.
د نوموړي په وينا، په دې بريدونو کې يوه ښځه ټپي شوې او خلکو ته درانه مالي زيانونه اوښتي دي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن