غزني ښار(پژواک ۳۰ تله ۹۳): د غزني ولايت په مقر ولسوالۍ کې د شپږو ولسواليو د فوټبال لوبډلو ترمنځ درې ورځنۍ سيالۍ د قره باغ ولسوالۍ په اتلوالۍ پاى ته ورسېدې.
د مقر ولسوالۍ سرپرست وحيدالله وايي،دغه سيالۍ دمقر،قره باغ، ګيلان،اندړ، واغز او جاغوري ولسواليو ترمنځ د ”سيارې” د دفتر په مرسته پيل شوې وې.
وحيدالله وايي: (( د دې سياليو موخه د سپورټ په برخه کې د ځوانانو هڅونه او د نشه يي توکو پر وړاندې مبارزه ده . دا سيالۍ به په راتلونکي کې دوام وکړي.))
دى زياتوي،دغه سيالۍ درې ورځې مخکې پيل شوې وې، چې نن د قره باغ ولسوالۍ په اتلولۍ پاى ته ورسېدې.
د مقر ولسوالۍ د فوټبال لوبډلې لوبغاړى ډاکټر صديق وايي، خوښ دى چې د لومړي ځل لپاره د غزني په يوه ناامنه ولسوالۍ کې داسې لوبې ترسره کېږي.
ده وويل،د سپورټ په برخه کې زياتې ستونزې شته، خو بياهم دوى خپلو لوبو ته ادامه ورکوي
ددې ولسوالۍ د فدراسيون مسوول حبيب الله جان وايي،دغه سيالۍ يې يواځې د ځوانانو د هڅونې په موخه ترسره کړې دي .
نوموړي پژواک اژانس ته وويل: (( پخوا دلته د مرمۍ غږ اورېدل کېده او د سپورټ له نوم سره څوک اشنا نه وو، خو اوس چې امنيت راغلى خلک بېرته خپل ژوند ته راګرځېدلي دي.))
د غزني مقر ولسوالۍ د غزني ښار سوېل ته په ۱۰۳ کيلومترۍ کې پرته ده ، چې تېرکلونه يې امنيتي حالت ډېر خراب بلل کېده.
