شپږم تعقيب-ښرنه (پژواک ٣ لېندۍ ٩٣): د پکتيکا چارواکي وايي چې د دغه ولايت په يحيی خېلو ولسوالۍ کې د ځانمرګي بريد په پايله کې د وژل شوو شمېر ٦٢ تنو ته رسېدلى او ٨٤ نور ټپيان شوي دي.
دغه پېښه پرون شاوخوا څلورنيمې بجې د يحيی خېلو ولسوالۍ په پړاو سيمه کې د واليبال د سياليو پر مهال رامنځته شوې ده.
د دغه ولايت د والي مرستيال عطاالله فضلي نن سهار پژواک خبري اژانس ته ويلي، څېړنې ښيي چې د دې پېښې د وژل شوو شمېر ٦١ تنو ته رسېدلى او ٦٦ نور ټپيان دي.
هغه وويل چې ښايي د تلفاتو شمېر تر دې هم لوړ شي؛ ځکه يو شمېر کسانو خپل عادي ټپيان شخصي روغتونونو ته وړي دي.
خو د پکتيکا د عامې روغتيا مشر ډاکټر ولي ګل نن ماښام پژواک خبري اژانس ته وويل، چې د وژل شويو کسانو شمېر ٦٢ کسانو ته رسيږي، چې شل تنه يې له پنځلسو کلونو د کم عمر ماشومان تشکيلوي.
هغه زياته کړه، چې د وژل شويو کسانو په ډله کې د يوه سيمه ييز قوماندان باول په ګډون ٩ سيمه ييز او د ملي امنيت يو کارکوونکى هم شامل دي.
د پکتيکا د عامې روغتيا رييس وايي، چې د ټپيانو شمېر ٨٤ تنو ته رسېدلى، چې ډېرى يې ماشومان دي او ٦٣ کسان يې د سختو ټپونو له امله د درملنې په موخه کابل ته لېږدول شوي دي.
له دې وړاندې د ملي دفاع وزارت وياند جنرال ظاهر عظيمي ويلي و، چې تر اوسه د پکتيکا له پېښې ٥٤ ټپيان د ملي اردو د چورلکو په وسيله کابل ته راوړل شوي او دا مهال د کابل د سردار محمد داوود خان په روغتون کې تر درملنې لاندې دي.
تېره شپه کابل ته د ټپيانو له راوړو سره سم لسګونه کسان ياد روغتون ته ولاړل او د ټپيانو لپاره يې وينه ورکړه.
د سردار محمددواو خان د روغتون مشرتابه ډاکټرانو نن د ليندۍ په ٣مه په خبري کنفرانس کې وويل چې د ٥٤ ټپيانو درملنه يې کړې او له دې ډلې د ١٢ تنو روغتيايي حال د اندېښنې وړ دى.
د پکتيکا د والي وياند مخلص افغان د لېندۍ په ٣مه پژواک خبري اژانس ته وويل له تېرو درېيو ورځو راهيسې د دغه ولايت د خيرکوټ، يوسف خېل او يحيى خېلو ولسواليو د ځوانانو تر منځ د واليبال سيالۍ روانې وې او پرون يې پايلوبه ترسره کېده.
د افغان په وينا، پاىلوبې د يحيى خېلو او خيرکوټ ولسواليو لوبډلو لاره موندلې وه او نندارې ته يې سلګونه کسان راغلي وو.
نوموړى وايي چې د پايلوبې پر مهال ځانمرګي بريدګر چې پر ځان پورې يې چاودېدونکي توکي تړلي وو، د نندارچيانو په منځ کې يې چاودنه ورکړه.
پرون ځايي چارواکو ويلي وو چې ځانمرګى بريد د موټرسايکل په وسيله ترسره شوى دى.
له بلې خوا ولسمشر اشرف غني او اجراييه رييس ډاکټرعبدالله عبدالله ياد ځانمرګی بريد پر کلکو ټکو غندلی دی.
