د زابل پوليسو لسګونه ميله وسلې ترلاسه کړې

کلات (پژواک، ٢٩ سلواغه ٩٣): د زابل امنيتي چارواکي وايي چې د امنيتي ځواکونو له لوري له يوه لارۍ موټره په زياته اندازه وسلې ترلاسه شوې دي.

د دغه ولايت د امنيه قوماندانۍ د امنيت امر ډګروال غلام جيلاني فراهي وايي، پوليسو کشفي معلومات ترلاسه کړي وو چې په يوه موټر کې په زياته اندازه وسلې لېږدول کېږي او دوى يې د مخنيوي هڅه وکړه.

د ده په خبره، پوليسو د زابل په شاه جوى ولسوالۍ کې دغه لارۍ موټر د پلټنې لپاره ودراوه او وروسته يې کلات ته را ولېږداوه.

د امنيت امر زياته کړه چې د يوه پلاوي له لوري په دغه موټر کې بار کانټينر پرانيستل شو چې په کې تر سل ډېرې سپکې او درنې وسلې وموندل شوې.

د هغه په وينا، په دغو وسلو کې ۵ پيکا، ۱۸۰ کلاشينکوفونه، ۲ دهشکې، تر ۵۰ زياتې مخابرې، په زرګونو مرمۍ او نور زيات مهمات شامل دي.

فراهي زياتوي، د لارۍ موټر چلوونکي هم د پوليسو له لوري نيول شوى، چې اوس ورڅخه تحقيقات روان دي.

نوموړي وويل، د دوى لومړني معلومات ښيي چې دغه وسلې له کندهاره غزني ته لېږدول کېدې، خو دا چې په کومې وسله والې ډلې پورې تړاو لري، لا معلومه شوې نه ده.