کندهار ښار (پژواک ١٨ زمرى ٩٤): د کندهار ښار يوه ځوان په يوه کمساري ګام کې د يوې کورنۍ د اووه غړو ژوند وژغوره.
دغه ځوان حميد الله نومېږي، چې شاوخوا ٢٥ کاله عمر لري او دا مهال په کندهار مستوفيت کې دنده تر سره کوي.
ياد شوى ځوان د تېرې جمعې په ورځ له خپلو ملګرو سره يو ځاى د تفريح لپاره د شاوليکوټ ولسوالۍ د دهلې بند ته تللى و، خو کله چې له هغې خوا بېرته راستنېده، نو په لاره کې يې يو موټر وليد چې اوبو ته لوېدلى او په کې سپاره ماشومان او لويان د خلاصون چيغې وهي.
حميدالله له پژواک خبري اژانس سره په ځانګړې مرکه کې د انساني ژوند ژغورنې دغه کيسه داسې پيل کړه: ((له خپلو ملګرو سره د مېلې لپاره دهلې بند ته تللى وم، خو کله چې له هغې خوا بېرته راتلو، د لارې په اوږدو کې يو فيلډر موټر، چې د يوې کورنۍ ٧ غړي [ماشومان او د هغوى پلار] په کې سپاره وو، د اوبو يوه ژور سربند ته لوېدلى و.))
هغه زياته کړه، دردوونکې دا وه چې موټر په اوبو کې سرچپه پروت و او کرار- کرار ډوبېده، خو دغلته ولاړو سلګونو خلکو د دې پر ځاى چې د هغوى د ژغورنې هڅه وکړي، يواځې يې ننداره کوله او په خپلو موبايلونو کې يې د دې پېښې ويډيوګانې ثبتولې.
دى وايي: ((خپل موټر مې د سړک يوې څنډې ته ودراوه، که څه هم اوبه ډېرې ژورې وې، خو پر ځان مې هر ډول خطر ومانه او اوبو ته ورکښته شوم، په خپلو لاسونو مې په ډېر زحمت د موټر هېندارې ماتې کړې، يو- يو کس مې له موټره را ايسته او په لامبو وهلو مې د سربند څنډې ته را رساوه.))
د ده په خبره، د موټر د هېندارو د ماتولو پر مهال يې لاس سخت ټپي شو او وينې ترې روانې وې، خو دى په ځان نه پوهېده او د انساني ژوند د ژغورلو لپاره يې خپل ځان هېر و.
دغه ځوان وايي، کله چې يې د يوې کورنۍ اووه واړه غړي روغ رمټ د ژورو اوبو له منځ څخه را وويستل، دا مهال نو دى هم په ځان نه پوهېده او د خپلو ملګرو له خوا د درملنې لپاره روغتون ته رسول شوى و.
دى وايي، له دې پېښې وروسته يې داسې نه احساسوله چې ګواکې کوم لوى کار يې کړى وي، خو کله چې په ټولنيزه مېډيا (فېسبوک) کې د ده دا هڅه وستايل شوه او ځوانانو ورباندې تبصرې وکړې، نو پوه شو چې دا يې لوى کار کړى دى.
نوموړي زياته کړه: ((له دې پېښې وروسته عجيب احساس کوم، هغو انسانانو ته سخت فکر وړى يم چې له بل انسان څخه ژوند اخلي او د هغوى تر منځ وېره او وحشت خپروي. زه پر هغوى غږ کوم چې د انسان وژنې پر ځاى د انسان ژغورنې لار ونيسي او په دې توګه هم خداى ته ځان نژدې کړي او هم د ولس تر منځ ځان ته غوره ځاى پيدا کړي.))
ياد شوي ځوان دغه راز له هغو کسانو چې د تفريح او يا هم چېرته د سفر پر مهال د موټر چلولو پر مهال بې احتياطي کوي، غوښتنه وکړه چې تل له احتياط څخه کار واخلي او ټاکلي اصول مراعات کړي، څو د ټرافيکي پېښو او انساني زيانونو مخنيوى وشي.
ده دا هم وويل چې شاوخوا ٢٥ تنه ملګري لري، چې تل د خوښيو او تفريح پر مهال سره يو ځاى وي، اوس به له همدغو ځوانانو سره په ګډه يوه رضاکاره ډله جوړوي، ترڅو د ستونزو پر مهال انسانيت ته خدمت وکړي.
د حاجي عزيز په نوم هغه کس څوک چې د خپلو شپږو اولادونو سره يو ځاى د يو ځوان د کم سارې مرستې په پايله کې له احتمالي مرګه وژغورل شو، وايي: ((خداى دې زموږ په هېواد کې همداسې ځوانان ډېر کړي چې د بل انسان ژوند وژغوري، نه دا چې له هغه ژوند واخلي.))
هغه زياته کړه، ډېر زيات خوښ دى چې د يوه ځوان د مرستې له برکته يې ژوند ژغورل شوى دى.
نوموړي له پژواک اژانس سره په خپلو خبرو کې وويل، د جمعې په ورځ له خپلو ماشومانو سره يو ځاى د مېلې لپاره دهلې بند ته تللى و، خو کله چې مازيګر ناوخته بېرته راتلل، په لاره کې يې د موټر ټاير وچاودېد، درې- څلور قاته واوښت او د اوبو يوه ژور سربند ته ولوېد.
دى وايي، هغه او اولادونو يې د اوبو له منځ څخه د ژغورنې لپاره چيغې او نارې وهلې، خو چا يې هم غږ نه اورېده او دغلته ولاړو خلکو يې يواځې ننداره کوله، بالاخره يو ځوان راغى او د هغوى د ژغورنې په خاطر يې پر ځان لوى خطر ومانه او دوى يې له اوبو څخه روغ رمټ را ووېستل.
نوموړي د خلکو پر دغه راز چلند او بې تفاوتۍ اندېښنه وښودله او ويې ويل: ((موږ ته دا نه ښايي چې يو انسان په خطر کې وي او بل يې د مرستې پر ځاى تشه ننداره کوي.))
هغه د دې سيمې د پوليسو له يوه قومندان (ناني) له ناسم چلنده هم شکايت وکړ او ويې ويل دغه راز کسان د پوليسو نوم بدوي.
دى وايي، په داسې حال کې چې هغه او اولادونه يې په وينو لړلي او بد حالت کې وو، د “ناني” په نوم د پوليسو قومندان د دې پر ځاى چې له هغوى سره انساني همدردي وښيي، دى يې په يوه کانټينر کې بندي کړ، چې وروسته د خلکو په مرسته راخلاص شو.
ده ادعا وکړه چې دغه قومندان د دې لپاره نوموړى بندي کړ، چې پيسې ورڅخه واخلي، ځکه له ده سره يوه اندازه پيسې وې.
نوموړي له اړوندو چارواکو وغوښتل، چې دغه راز کسان د پوليسو له ليکو وباسي.
د انساني ژوند د ژغورلو دغې پېښې په ټولنيزې مېډيا کې د ګڼو خلکو پام ځان ته ور واړاوه او د حميد الله نوم دغه ځوان يې اتل وباله، چې خپل ځان يې ټپي کړ، خو د خلکو ژوند يې وژغوره.
نن مازيګر ناوخته د همدغه ځوان د ستايلو په موخه په کندهار ولايت مقام کې يو لړ مراسم جوړ شوي وو، چې ولايتي ادارې او د مدنې ټولنې د استازو له خوا ورته ستاينليکونه هم ورکړل شول.
په دې مراسمو کې د کندهار د والي مرستيال عبدالعلي شمسي وويل: ((په فېسبوک کې يې د ډېرو ځوانانو پوسټونه وليدل چې ليکلي يې وو، چې دلته انسانان د انسانانو کورونه ورانوي، خو داسې ځوانان هم شته چې د انسانانو ژوند ژغوري.))
د ده په خبره، همدې ټکى هغه اړ کړ چې د ځوان حميدالله دغه اتلولي وستايي.
د نوموړي په وينا، د ياد شوي ځوان دغه کړنه ټولو هېوادوالو ته دا پيغام ورکوي، چې هغوى بايد په سختو حالاتو کې د خپلو خلکو لاسنيوى وکړي، نه دا چې د هغوى ژوند له خنډ سره مخ کړي.
Views: 2
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن