پکتیکا کې د بې پيلوټه الوتکې بريد کې ٢٠ مشکوک کسان وژل شوي

ښرنه (پژواک، ١٩ ورى ٩٥): د پکتيکا ولايتي شورا او ځايي اوسېدونکي ادعا کوي چې د بهرنيو ځواکونو د بې پيلوټه الوتکې بريدونو کې د قومي مشرانو په ګډون ٢٠ ملکي وګړي وژل شوي، خو امنيه قوماندان وژل شوي کسان وسله وال مخالفين بولي.

د ګومل ولسوالۍ د بانځو کلي اوسېدونکي محمدحنيف د وري په ١٩مه پژواک خبري اژانس ته وويل چې ياد هوايي بريدونه د دې ولسوالۍ د بانځو او کاکړزو په سيمو کې شوي چې له امله يې ٢٠ کسان وژل شوي او يو بل ټپي دى.

نوموړي زياته کړه، لومړی بريد تېره ورځ غرمه مهال د دې ولسوالۍ د بانځو په سيمه کې هغه مهال وشو چې يو شمېر عام خلک په يو ډاډسن موټر کې د يوې قضيې د حل په موخه کاکړزو سيمي ته روان وو.

هغه زياتوي چې پر ياد موټر د بې پيلوټه الوتکې په بريد کې ١٥ عام وګړي وژل شوي چې ډېرى يې د سيمې مخور او قومي مشران دي او يو تن سخت ټپي دى.

د حنيف په وينا، دوهم بريد مازديګر پنځه بجې پر دوو موټرسايکلونو ترسره شوى چې په پايله کې يې پنځه عام وګړي وژل شوي دي.

د پکتيکا د ولايتي شورا مرستيال نعمت الله بابري هم د يادې پېښې د پخلي تر څنګ پژواک ته وويل چې په يادو دواوړ بريدونو کې عام خلک وژل شوي دي.

هغه په وژل شوو کسانو کې د وسله والو مخالفينو شتون رد کړ.

د بابري په وينا، د يادې سيمې خلک د غرونو پر سر ستونزې او بدۍ لري چې د ځان ساتلو لپاره له ځان سره وسله ګرځوي.

بل پلو د پکتيکا امنيه قوماندان مل پاسوال زړور زاهد وايي چې تېره ورځ غرمه مهال د يو هوايي بريد په پايله کې ۹ وسله وال طالبان وژل شوي او په دوهم بريد کې پنځه نور وسله وال وژل شوي دي.

نوموړی په دغه بريد کې د ملکي وګړو د مرګ ژوبلې په اړه وايې چې له يادو کسانو سره وسلې وې، نو ځکه د ايتلاف هوايي ځواکونو په نښه کړي او که قومي مشران وای، دوی بايد د وسلو د شتون په صورت کې دولت په جريان کې اچولی واى.

ايتلافي ځواکونو تر اوسه په دې اړه څه نه دي ويلي.

وسله والو طالبانو د يوې خبرپاـڼې په خپرولو سره وژل شوي کسان عام وګړي ياد کړي.