په شمال زون کې د کوچيانو سراسري شورا پرانېستل شوه

مزارشريف (پژواک، ۲۳ ليندۍ ۹۵): د شمال زون کوچيان وايي، حکومت له تېرې  لسيزې د دوی ستونزو ته پاملرنه نه ده کړې.

کوچي سرخېلانو دغه څرګندونې د ليندۍ په ۲۲مه، په مزارشريف ښار کې د شمال زون د کوچيانو سراسري شورا په پرانېست غونډه کې وکړې.

په دغې ناسته کې د شمال زون د بېلا بېلو ولايتونو له کوچي سرخېلانو سربېره د بلخ سرپرست والي، د کوچيانو د لوى رياست رييس، په ولسي جرګه کې د کوچيانو وکيلانو او د کوچيانو په برخه کې د جمهوري رياست سلاکار برخه لرله.

په افغانستان کې د کوچيانو د لوی رياست رييس دلاور فيضان، د يادې غونډې په څنډه کې پژواک خبري اژانس ته وويل، مزارشريف ته سفر يې په شمال کې د کوچيانو د سراسري شورا پرانېستل، د پوهنې په برخه کې د کوچيانو د ستونزو هوارول او د دوی د مالدارۍ پياوړي کېدل يې موخې دي.

ده ډاډ څرګند کړ چې کوچيان له دولت سره د چارو د سمون په خاطر همغږي دي.

نوموړي زياته کړه، دولت هم د دوی ستونزو ته د ستونزې په سترګه ګوري او د هوارولو لپاره يې ژمنې کړې دي.

د يادې غونډې په اوږدو کې د شمال زون د کوچيانو سراسري شورا هم پرانېستل شوه.

د دغې شورا مشر سيد محمد حريق پژواک ته وويل، له تېرې يوې لسيزې د شمال زون کوچيانو ته هېڅ ډول پاملرنه، نه ده شوې.

ده زياته کړه، کوچيانو ته د تذکرو نه ورکول، د څړځايونو غصب او د پوهنې په برخه کې کوچيانو ته د دولت نه پاملرنه د دوی عمده ستونزې دي.

بلخواد بلخ سرپرست والي عطامحمد نور يادې غونډې ته په وينا کې د کوچيانو د څړځايونو د غصب موضوع تاييد کړه او ويې ويل، له يادې شورا سره په همغږۍ به د دغې ستونزې د حل لپاره کار وکړي.

نور وويل: ((د کوچيان څړځايونه غصب کېږي، ځنګلونه يې خرابېږي، مېنې او دښتې يې تالا کېږي.))

د هغه په وينا، په شمال کې کوچيان له ګڼو ستونزو سره مخامخ دي او دولت بايد د هغوى د ستونزو د حل کولو لپاره جدي ګامونه پورته کړي.

login or register a new account.