په غزني کې شپږ طالبان او درې ملکي وګړي وژل شوي

غزني ښار(پژواک،٢٧ورى٩٦):د غزني امنيتي چارواکي وايي چې په اندړو ولسوالۍ کې د امنيتي ځواکونو او طالبانو ترمنځ نښته کې شپږ طالبان او درې ملکي وګړي وژل شوي دي.

د غزني امنيه قوماندان مل پاسوال امين الله امرخېل د وري په٢٧مه پژواک خبري اژانس ته وويل چې نن سهار وسله والو طالبانو په اندړو ولسوالۍ کې د سيمه ييزو پوليسو پر امنيتي پوستې بريد وکړ.

هغه وايي چې په دې بريد کې شپږ طالبان و وژل شول او يو شمېر نور يې ټپيان دي.

ده وويل چې له جګړې لږ  وروسته طالبانو د هاوان يوه مرمۍ توغولې چې پر يوه کور لګېدلې ده.

د امرخېل په وينا، د همدې هاوان مرمۍ د لګېدو له امله درې ملکي کسان وژل شوي او کور يې هم ويجاړ شوى دى.

د اندړو ولسوالۍ د غونډۍ سيمې اوسېدونکي محمداشرف پژواک ته وويل چې نن سهار څو ساعته د دوى په کلي کې جګړه وه.

ده وويل چې د همدې جګړې په ترڅ کې پر يوه کور د هاوان مرمۍ لګېدلې چې له امله يې پنځه تنه وژل شوي دي.

د هغه د معلوماتو له مخې، په وژل شويو کسانو کې دوه نارينه، دوه ماشومان او يوه ښځه شامل دي.

وسله وال طالبان هم دغه جګړه تاييدوي.

د دې ډلې وياند ذبيح الله مجاهد وايي چې نن سهار د اندړو ولسوالۍ په ميدانوالو سيمه کې طالبانو د پوليسو پر پوستې بريد کړى دى.

هغه وويل چې په دې بريد کې درې پوليس وژل شوي او دوه پوليس او يو طالب ټپيان شوي دي.

د مجاهد د معلوماتو له مخې، وروسته د امنيتي ځواکونو د هاوان يوه مرمۍ په غونډۍ کلي کې د محمد نذير پر کور لګېدلې ده.

login or register a new account.