خوست ښار (پژواک، ۲۳ زمری ۹۶): د خوست د يو شمېر مدني ټولنو او شوراګانو غړي وايي، مرکزي حکومت هغه ژمنې نه دي عملي کړې چې د خوست له خلکو سره يې څو څو ځلې کړې دي.
هغوی چې د مدني ټولنو او شوراګانو په نوم يې يو نوی ايتلاف رامنځته کړی، د زمري په ٢٣مه يو خبري کنفرانس ته وويل، که مرکزي حکومت ژر له دوی سره کړې ژمنې عملي نه کړي، نو له هرې ممکنې لارې به د خپل حق ترلاسه کولو ګټه واخلي.
د دغه ايتلاف يوه غړي تواب جان غفوري چې په دغه ولايت کې د جمعيت ګوند مشر دى، وويل چې ولسمشر او اجرائيه ريیس ټولې هغه ژمنې چې د ټاکنيزو منډو ترړو پر مهال يې له دوی سره کړې وې، تر اوسه يوه هم نه ده عملي شوې.
هغه زياته کړه: ((زموږ یوه غوښتنه د هوايي ډګر جوړېدل و چې اوس هم ځای پر ځای پاتې ده، د غلام خان لار نه ده ترانزيټ شوې، د برق پروسه ډېره ټکنۍ ده. په مرکزي دولت کې جنوبي سمت موږ يو وزير هم نه لرو.))
په خوست کې د مجاهدينو د اسلامي شورا غړي چې د دغه ايتلاف غړيتوب هم لري، قاري عبدالولي عادل کنفرانس ته وويل چې د لويې پکتيا په ځانګړي ډول د خوست ولسونو هر وخت له دولت ننګه کړې، هغوی په مقابل ورسره دولت تل د مور او ميرې سلوک کړی.
نوموړى وايي: ((خوست ته بايد پاملرنه زياته شي دا يو سرحدي ولايت دی او کله چې له خوست نه مشکل پيدا شوي دي په ډېر کم وخت هر دولت په کابل کې نه دی پاتې شوی. دولت بايد زموږ لوستي کسانو ته ادارو کې ځای ورکړي شي او خپل حقوق راکړي.))
د کنفرانس ګډونوالو همدارنګه د يوه پرېکړه ليک په خپرولو سره له شته نظامه هم ملاتړ څرګند کړ او د پرېکړه ليک په يوه برخه کې راغلي وو چې دوی به هغو اشخاصو او کړيو ته د فعاليت اجازه ورنه کړي چې د عامو افغانانو پر سر معاملې کوي.
د يادونې ده، تر دې مخکې په کابل، ختيځ او شمال کې هم ځيني سياسي ايتلافونه او شوراګانې جوړې شوې دي
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن