کندوز ښار (پژواک، ٢٠ وږى ٩٦): په کندوز کې امنيتي چارواکي وايي چې د انسان تښتوونکو څلور کسيزه ډله يې نيولې ده.
د کندوز ولايت مرستيال او سرپرست حشست الله رحيمي عرضبيګي نن د يوې خبري غونډې پر مهال خبريالانو ته وويل چې دا ډله د ملي امنيت د منسوبينو له لوري نيول شوې ده.
هغه زياته کړه: ((وروسته له هغه چې دغه ډلې ١١ کلن ماشوم نذيرالله د کندوز ښار له کوټه ګرد ساحې نه برمته کړ، د ملي امنيت د موظفينو تر تعقيب لاندې و، خو له نېکه مرغه چې د ملي امنيت په هڅو له يوه سراچه موټر سره ونيول شوه.))
د نوموړي د معلوماتو له مخې، دغه تښتوونکو د نذيرالله د رهايي په بدل کې د هغه له کورنۍ نه د ١٥زره امريکايي ډالرو او پنځه سوه زره افغانيو غوښتنه کړې وه.
له بلې خوا نذيرالله پژواک ته وويل: ((کله چې له جومات نه ووتم، څو کسانو مې خوله وتړله، موټر ته يې ننويستم او بې هوښه شوم.))
نذيرالله ته ژړا د دې اجازه نه ورکوله چې پاتې نورې پوښتنې هم ځواب کړي.
د نوموړي پلار چې له هېواده بهر ژوند کوي، له امنيتي ځواکونو په منني ټينګار وکړ چې عدلي او قضايي ارګانونه بايد نيول شوو کسانو د خپلو اعمالو سزا ورکړي.
login or register a new account.
