کابل- کلات (پژواک، ٢٢ ليندۍ ٩٦): د ميدان وردګو ولايت په ميدان ښار کې د ماشومانو يو پارک پرانيستل شو، بلخوا په زابل ولايت کې یوه ښوونځي ته ودانۍ جوړه شوه.
د ميدان وردګو د والي وياند عبدالرحمن د ليندۍ په ٢٢مه پژواک خبري اژانس ته وويل چې د ماشومانو پارک د ولایت مرکز ميدان ښار کې پر ۱۲ جریبه ځمکه جوړ شوى دى.
هغه زياته کړه چې دغه پارک د ښاروالۍ له پرمختیايي بودیجې د ۱۱.۹ میلیونه افغانیو په ارزښت په اساسي ډول د څلورو کلونو په موده کې رغول شوى دى.
د میدان وردګو والي انجنیر ځنډي ګل زماني د دغه پارک د پرانيستلو پر مهال وويل، ماشومان به وکولای شي چې د مطالعې او لوبو لپاره له يو مناسب ځای څخه برخمن شي.
د غه راز د میدانښار سرپرست ښاروال انجنیر میر اقا شهیر وویل چې په دغه پارک کې د ماشومانو لپاره د لوبو وسایل، زینتي بوټي او نیالګي، ګلان، د لوبو میدانونه او هم د پارک د ساتنې او مراقبت په خاطر د پارک د کار کونکو لپاره د اوسیدلو خونې جوړې شوې دي.
د يو بل خبر له مخې، په زابل ولايت کې د اتلس میلیونه افغانيو په لګښت د چوڼۍ په نوم ښوونځي ودانۍ ګټې اخيستني ته وسپارل شوه.
د والي وياند ګل اسلام سيال پژواک ته وويل چې پر دې ودانۍ ١٨ ميليونه افغانۍ لګښت راغلى چې د پوهنې وزارت له انکشافي بودیجې ورکړل شوى دى.
هغه زياته کړه چې دا ودانۍ د کلات ښار يوه ښوونځي ته جوړه شوې چې تر اوسه يې په کرايي کور کې فعاليت کولو.
د زابل د پوهنې رييس رحيم الله لودین وايي د ښوونځيو لپاره د معیاري ودانیو نشتوالی یې عمده ستونزه ده او اوس پدې هڅه کې دي چې دغه ستونزه په تدریجي ډول را کم کړی.
د هغه په وينا، دغه ښوونځي شاوخوا ۲۰۰۰ تنه زده کوونکي لري چې تر دې وړاندی یې په کرايي کور کې د تدریس چاري پر مخ وړلې .
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن