پکتیکا کې یو ځانمرګی موخې ته له رسېدو مخکې وژل شوی

ښرنه (پژواک، ١٩ مرغومى ٩٦): په پکتيکا کې يو ځانمرګی موخې ته له رسېدو مخکې وژل شوى او په يوه بله پېښه کې د تحريک طالبان پاکستان درې غړي نيول شوي دي.

د پکتيکا د ملي امنيت يوې سرچينې د مرغومي په ١٩مه پژواک خبري اژانس ته وويل، يوه ځانمرګي بريدګر چې غوښتل يې د ولايت پر مقام بريد وکړي، د امنيتي موظفينو له خوا موخې ته له رسېدو وړاندې ووژل شو.

هغه وويل: ((د بريد کوونکي په اړه موږ له وړاندې کشفي معلومات ترلاسه کړي وو، زموږ تر تعقيب لاندې و چې د ولايت دروازې ته نږدې  ووژل شو.))

دغه راز د يو بل خبر له مخې، د دغه ولايت په زېړوک ولسوالۍ کې د تحريک طالبان پاکستان درې غړي له يو شمېر وسلو او چاودېدونکو توکو سره نيول شوي دي.

د پکتيکا امنيه قوماندان مل پاسوال محمد عظيم هاشمي پژواک ته وويل چې تېره ورځ پوليسو د يو لړ ځانګړو عملياتو په ترڅ کې د زېړوک ولسوالۍ په زېړوک کلي کې درې طالبان نيولي دي.

هغه وويل چې له دغو طالبانو يو شمېر وسلې او  چاودېدونکي توکي هم ترلاسه شوي دي.

خو بل لور ته يوې حکومتي سرچينې پژواک ته وويل چې ياد نيول شوي کسان د تحريک طالبان پاکستان غړي دي.

هغه وويل چې دغه طالبان له وزيرستانه زېړوک ته را اوښتى وو چې د پوليسو له خوا ونيول شول.

د افغان دولت وسله والو مخالفينو د يادو پېښو په اړه تر اوسه رسنيو ته څه نه دي ويلي.