شاهين قول اردو: اوه طالبان د خپل ماين په چاودنه کې وژل شوي

مزار شريف (پژواک، ٨ کب ٩٨) : په شمال کې د شاهين قول اردو وايي چې د ماين په يوه چاودنه کې اوه تنه وسله وال طالبان وژل شوي دي.

د ٢٠٩ شاهين قول اردو لخوا د کب په ٨ مه، په يوه خپره شوې خبرپاڼه کې راغلي، چې دا چاودنه پرون مازيګر د بلخ ولايت په دولت ولسوالۍ کې شوې وه.

سرچينې زياته کړې چې د وسله والو طالبانو يو عراده موټر د يادې ولسوالۍ په پول بلداى کلي کې ددوى لخوا پر ځاى پر ځاى شوي ماين ختلى او چاودنه يې کړې ده.

قول اردو ويلي چې په دې چاودنه کې اوه تنه وسله وال طالبان وژل شوي او د هغوى موټر هم له منځه تللى دى.

په خبرپاڼه کې راغلي چې په دې چاودنه کې ملکي وګړو ته هېڅ زيان نه دى رسېدلى.

وسله والو طالبانو تر اوسه په دې اړه څه نه دي ويلي.