کابل (پژواک، ١٣ ليندۍ ٩٩): د ناټو سرمنشي جينز سټولټنبرګ وايي چې له افغانستانه د خپلو ځواکونو تر کمولو وروسته به هم امريکا هلته د ناټو د ماموريت ملاتړ کوي.
د ناټو سرمنشي دغه څرګندونې پرون ناوخته په بلجيم کې ددغه سازمان د بهرنيو چارو وزيرانو تر دوه ورځنۍ غونډې وروسته په يوه انلاين خبري ناسته کې وکړې.
په دې کنفرانس کې د ناټو پر اړونده موضوعاتو، افغانستان کې د ناټو ماموريت او افغان سولې پروسې په اړه خبرې اترې وشوې.
نوموړي د افغان سولې پروسې په تړاو د وروستيو پرمختګونو هرکلى وکړ او ويې ويل چې دا ددې پروسې د برياليتوب لپاره يو مهم اقدام دى.
په قطر کې د افغانستان د اسلامي جمهوري دولت او طالبانو مرکچي پلاوو تر څو اوونيو ناندريو وروسته پرون پر طرز العمل موافقه وکړه او ټاکل شوې چې ډېر ژر د اجنډا په اړه خبرې اترې پيل کړي.
د ناټو سرمنشي وايي، له پروني پرمختګ څخه په ډاګه شوه، چې دواړه لوري د سولې مذاکراتو د برياليتوب لپاره هڅې کوي او غواړي چې نور پرمختګونه هم وکړي.
ده زياته کړې، دا پرمختګ ځکه مهم دى چې افغانان نور سوله ييز ژوند غواړي .
د ځواکونو د ايستلو په تړاو د يوې پوښتنې په ځواب کې سټولټنبرګ وويل، ټولو امريکايي چارواکو ويلي چې له افغانستان څخه د خپلو ځواکونو له ايستلو وروسته به هم هلته د ناټو له ماموريت سره همکاري جاري ساتي.
ده زياته کړه : ” زموږ پوځي قوماندانانو هم ډاډ راکړى چې د امريکا مرستې او همکارۍ سره به په افغانستان کې د ناټو د روزنې ماموريت ادامه مومي. ”
د ناټو سرمنشي وايي چې د دوى ماموريت به په افغانستان کې اوسني شکل سره ادامه کوي، چې په شمال کې به جرمني ځواکونه، په لوېديځ کې به د ايټاليا په مشرۍ او په کابل کې به هم د ترکيې په ګډون يو شمېر هېوادونه فعاليت کوي.
ده وويل، چې اوس مهال هم د روزنې د ماموريت نيمايي سرتېري غير امريکايي د اروپايي هېوادونو اړونده دي.
خو د ناټو سرمنشي وويل چې په افغانستان کې د ځواکونو په تړاو د دوى وروستۍ ارزونه به دوه مياشتې وروسته د ناټو د دفاع وزيرانو په غونډه کې کېږي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن