په بلخ کې د ترافیکي پېښې له امله اووه کسان مړه شوي

مزارشريف (پژواک، ۲۰ لیندۍ ۹۹): په بلخ کې د ترافیکي پېښې له امله د درېیو ښځو او یوه ماشوم په ګډون اووه کسان مړه شوي او دوه نور ټپیان دي.

د بلخ د پولیسو مطبوعاتي مسوول عادل شاه عادل نن د لیندۍ په ۲۰ مه پژواک ته وویل، یاده پېښه تېر ماښام د بلخ ولایت په شولګره ولسوالۍ کې رامنځته شوې ده.

د عادل په خبره، یو باروړونکي موټر چې له شولګرې ولسوالۍ څخه مزار شریف ته روان و له سراچې موټر سره ټکر کړی دی.

هغه زیاته کړه، په دغه ټکر کې په سراچه موټر کې ناستو اووه کسانو ساه ورکړې او دوه نور ټپیان دي.

د سرچینې په خبره په مړو کې درې ښځې، درې نارینه او یو ماشوم شامل دی او دوه ښځې ټپیانې دي.

نوموړي زیاته کړه، د دې پېښې په تړاو د باروړونکي موټر موټر چلوونکی نیول شوی او تر څارنې لاندې دی.

Views: 3