جلال اباد (پژواک، ۲۴ مرغومی ۹۹): د ننګرهار ولايت د استيناف محکمې اداري مدير د دغه ولایت په مرکز جلال اباد ښار کې د ناپېژاندو وسله والو په بريد کې وژل شوی دی.
د معلوماتو له مخې، عبدالقيوم نعيمي له کوره دندې ته روان و چې وسله والو پرې ډزې کړې دي.
د ننګرهار ولايت يوې باوري امنيتي سرچينې پژواک ته د نوم نه ښودو په شرط پژواک ته وويل، نن سهار شاوخوا اته بجې د جلال اباد ښار څلورمې ناحيې اړوند د تلاشۍ چوک سيمه کې ناپېژاندو وسله والو د دغه ولايت د استيناف محکمې رياست پر اداري مدير باندې ډزې وکړې.
دی وايي چې په ياد بريد کې عبدالقيوم نعيمي لومړی سخت ټپي و خو وروسته یې ساه ورکړه.
د ننګرهار استيناف محکمې يوې سرچينې هم پژواک یاده پېښه تایید کړه.
د دې هدفي وژنې مسووليت تر اوسه چا پر غاړه نه دی اخيستی.
