کابل (پژواک، ۴ سلواغه ۹۹): د ولسمشرۍ چارو اداره وایي، ولسمشر د یوه فرمان له مخې عبدالهادي ارغندیوال له دندې ګوښه کړی او خالد پاینده یې د مالیې وزارت سرپرست ټاکلی دی.
د ولسمشرۍ مطبوعاتي دفتر اعلامیې له مخې چې نن خپره شوې او کاپي یې پژواک ترلاسه کړې، راغلي، د افغانستان اسلامي جمهوریت ولسمشرۍ د جلا حکمونو له مخې، د مالیې وزیر عبدالهادي ارغندیوال له دندې ګوښه کول او د دغه وزارت سرپرست په توګه د خالد پاینده ټاکل منظور کړل.
سرچینې لیکلي چې د ولسمشرۍ په حکم کې د مالیې وزیر ګوښه کېدو لاملونه «د عوایدو په راټولولو کې ځنډ، په مالیې وزارت کې د ناقانونه مقرریو څېړلو لپاره له ګډ پلاوي سره نه همکاري او د دې څېړنو مخنیوی؛ د مدیریت ضعف، د ښې حکومتولۍ ارزښتونو ته د نه ژمنتیا، په ټاکل شوو دندو کې د اساسي قانون ۷۷مې مادې نه رعایتول او د ولسمشرۍ عالي مقام له حکمونو او لارښوونو سرغړونه بلل شوي دي.
په خبرپاڼه کې راغلي چې ولسمشرۍ ریاست د اساسي قانون ۶۴مې مادې د ۱۱مې فقرې له مخې، د مالیې وزیر عبدالهادي ارغندیوال له دندې لرې کول او د دغه وزارت د سرپرست په توګه د خالد پاینده ټاکل منظور کړي دي.
دا په داسې حال کې ده چې عبدالهادي ارغندیوال دوه میاشتې مخکې له ولسې جرګې د باور رایه هم ترلاسه کړې وه.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن