هرات (پژواک، ۱۱ غبرګولی ۱۴۰۰): یو شمېر مدني او سیاسي فعالان، د هرات ولایت د سوداګرۍ او صنایعو خونې د نفتو او ګازو کمېټې مسوولین وايي چې د دغه ولایت په ګمرک کې فساد د هرې ورځې په تېرېدو ډېرېږي، باید مخه یې ونیول شي.
یو شمېر مدني او سیاسي فعالان، د سوداګرۍ او صنایعو خونې د نفتو او ګازو کمېټې مسوولین، د زعفران کارانو ټولنې غړي او سوداګرو ښځو نن د هېواد په ځانګړې توګه هرات ولایت ګمرک کې د فساد د ډېرېدو له امله د اعتراض په ډول د دغه ګمرک مخې ته اعتراض کړی دی.
د دوی په خبره، فساد کوونکي هره ورځ د ګمرک عایدات حیف و میل کوي، په ایران، ترکیه او دوبۍ کې پانګونه کوي او پر عیاشۍ ګرم دي.
د افغانستان د سوداګرۍ او صنایعو خونې د نفتو او ګازو کمېټې مرستیال سید مسعود سادات په دې ناسته کې د باج اخیستو، هره ورځ له محصول پرته د لسګونو موټرو د بهر کېدو یا د مالونو د تغییر خبر ورکړ.
هغه وايي، ډېری قېمتي توکي د ټیټ قېمت لرونکو توکو په نوم په هرات ګمرک کې محصول کېږي.
هغه ټینګار کوي چې حکومت ته د ګمرک فساد کوونکي معلوم دي او باید افشا یې کړي.
هغه زیاته کړه: ((په تېرو څو کلونو کې ان یو بوتل ریډبول او مانسټر انرژي، یا نورې بهرنۍ انرژۍ او ځینې نور قېمتي توکي د اسلام کلا بندر په ګمرک کې نه دي محصول شوي په داسې حال کې چې هره ورځ د دغو انرژیو ډېر کانټینرونه هېواد ته وارېدېږي.))
سیاسي فعال نعیم غیور په دې ناسته کې وویل، د افغانستان په ګمرکونو په ځانګړې توګه هرات کې یې چاړه د خلکو تر هډوکو رسولې ده.
غیور چې څه موده مخکې یې د پولیسو په کشفي برخو کې کار کاوه وايي، د ګمرک ځينې مافیايي کارکوونکي د حکومت عایدات د خپلو عیاشیو په محفلونو کې مصرفوي.
هرات کې د افغان زعفران کارانو د ټولنې رییس بشیر احمد رشیدي په دې ناسته کې د تېر کال په پرتله د زعفرانو د بیې د ۵۰ سلنې ټيټېدو خبر ورکړ.
نوموړي وویل، په داسې حال کې چې هره میاشت څو ټنه زعفران له هراته بهرنیو هېوادونو ته صادروي خو د دغه ولایت په بازار کې د زعفرانو بیه د هرې ورځې په تېرېدو کمېږي.
هغه په هرات کې د زعفرانو د بیې د ټيټېدو لامل د ایراني زعفرانو ناقانونه واردات بولي او وايي، امنیتي او کشفي بنسټونه په دې برخه کې ناغېړي کوي.
یوشمېر مدني فعالانو او سوداګرو ښځو هم په دې ناسته کې وویل، د ګمرک په اداره کې د سرپرستانو د کار دوام او په دغه ګمرک کې د سکنرونو نه موجودیت د فساد د ډېرېدو لامل شوی دی.
بلخوا د مالیې وزارت د ګمرکونو ادارې مرستیال عمر مهمند د هېواد په ګمرکونو کې د فساد موجودیت مني او وايي، د ګمرکونو په فساد کې هغه ادارې هم ښکېلې دي چې له ګمرکونو سره سر و کار لري.
هغه په وروستیو څو میاشتو کې د هېواد په ګمرکونو کې د اصلاحاتو خبر ورکوي او اويي، د دغه اصلاحاتو له امله په تېرو پنځو میاشتو کې د هېواد د ګمرکونو عایدات د تېر کال د همدې مودې په پرتله ۲۷ سلنه ډېر شوي دي.
د مهمند په خبره، د ۱۳۹۹ مالي کال په تېرو پنځو میاشتو کې د ګمرکونو عایدات ۲۲،۴ میلیارد افغانۍ و خو د روان مالي کال په پنځو میاشتو کې دغه کچه ۲۵،۵ سلنې ته لوړه شوې ده.
د هرات ګمرک سرپرست نثار احمد ناصري هم په یاد ګمرک کې د فساد موجودیت مني خو وايي چې په تېرو دوو میاشتو کې د رامنځته شوو اصلاحاتو له امله د تېر کال د همدې مودې په پرتله د هرات ولایت د ګمرک عایدات ۲۴ سلنه ډېر شوي دي.
بلخوا د هرات والي سید عبدالوحید قتالي نننۍ ناستې ته وویل، په ګمرک کې اصلاحات د رامنځته کېدو په حال کې دي.
هرات ګمرک کې د پراخ فساد پر موجودیت نیوکې په داسې حال کې دي چې څو اوونۍ مخکې مالیې وزیر د استازو ناستې ته وویل، په اسلام کلا ګمرک کې چور روان دی او هره ورځ د دولت میلیونونه عایدات حیف و میل کېږي.
Views: 46
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن