اسعد اباد (پژواک، ٢ چنګاښ ١٤٠٠): د کونړ حکومتي مسوولين وايي چې په مرکز اسعداباد کې د هاوان څلور مرمۍ لګېدلې دي چې په ترڅ کې یې پنځه کسان ټپيان شوي او د ولايتي روغتون د واکسين ساتنې خونې هم اور اخيستى دى.
د کونړ والي محمد اقبال سعيد د چنګاښ په دويمه پژواک خبري اژانس ته وويل چې وسله والو طالبانو نن سهار پر مرکز اسعداباد څلور د هاوان مرمۍ توغولې دي.
هغه وايي چې د هاوان مرميو لګېدو له امله پنځه ملکي کسان ټپيان شوي او نورو خلکو ته ماليي زيانونه هم اوښتي دي.
په ورته وخت کې د کونړ د عامې روغتیا ریيس ډاکټر عزیزالرحمن ساپي پژواک ته وويل چې نن سهار شاوخوا شپږ بجې د ولایتي روغتون د واکسین ساتنې پر خونه د هاوان مرمۍ لګېدلې ده.
هغه زياته کړه: ((په دې پېښه کې د واکسين ساتنې خونې يخچالونه او لس ډوله واکسين له منځه تللي دي.))
دى وايي چې د هاوان د يادې مرمۍ د لګېدو له امله ولايتي روغتون ته شاوخوا لس ميليونه افغانۍ زيان هم اوښتى دى.
بل لورته وسله والو طالبانو تر اوسه په دې اړه څه نه دي ويلي.
د يادونې ده چې په دې وروستيو کې په ټول هېواد کې د حکومتي ځواکونو او وسله والو طالبانو ترمنځ جګړو زور اخيستى چې له امله يې ملکي وګړو او ملکي سيمو ته هم زیانونه اوړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن