ترینکوټ، ښرنه (پژواک، ۳ چنګاښ ۱۴۰۰): پکتیکا او اروزګان ولایتونو کې هم سلګونو ولسي پاڅون کوونکو د افغان امنیتي او دفاعي ځواکونو په ملاتړ وسلې پورته کړې .
د اروزګان پاڅون کوونکو چې له ځان سره یې سپکې او درنې وسلې هم درلودې، د ولایت مرکز ترینکوټ غازي امان الله خان څلور لارې کې د یوې ټوليدنې پر مهال رسنیو ته وویل، د وسلو له راپورته کېدو څخه یې موخه د وطن ساتنه ده.
د پاڅون کوونکو یوتن غړي مولوي حمدالله وویل، کلونه کیږي چې وسله وال طالبان او یاهم نورې ډلې د افغان ولسونو د وژنې لپاره راپورته شوي او خلکو ته یې دروند زیان اړولی دی.
هغه زیاته کړه، وسله وال طالبان دې پوه شي، چې هر افغان له وطن څخه د ساتنې وړتیا لري او دغه ډله به پرمختګ ته پرې نږدي.
د پاڅون کوونکو یو بل تن شېرمحمد افغانزي وویل، هغوی ځکه نن د افغان امنیتي او دفاعي ځواکونو په ملاتړ وسلې اخیستې دي، چې وښیي دا ځواک یوازې نه دی او خلک ورسره ولاړ دي.
دغو پاڅونوالو یوځل بیا پر طالبانو غږ وکړ چې سولې ته غاړه کېږدي، کنې هغوی به یې پر وړاندې تر هغه وجنګیږي، ترڅو دغه ډله په بشپړه توګه ختمه شوې وې.
بلخوا پکتيکا ولایت کې هم سلګونو کسانو پاڅون وکړ او وايې چې په خپلو امکاناتو له امنيتي سرتېرو او نظام حخه په کلکه ملاتړ او ننګه کوي.
په دې اړه پکتيکا کې يوه لويه غونډه رابلل شوې وه، چې د دغه ولايت د ډېری ولسواليو قومي مشرانو او ځوانانو په کې ګډون کړی وو .
د پاڅونوالو یوتن غړي نيک محمد پژواک ته وويل چې په هېواد کې د روانې جګړې د شدت له امله د خپل ځان او امنيتي ځواکونو د ساتنې او ملاتړ په موخه يې عملي وسله پورته کړې.
هغه وايي چې د ارګون، سروبي، زيړوک او ځينو نورو ولسواليو خلکو پاڅون کړی دی.
د نوموړي په وینا، په بشپړ ډول يې خپل امکانات په کار اچولي او د خپلو ټولو سيمو امنيت به په خپله ساتي.
د پکتيکا د مدني ټولنو د همغږۍ د دفتر مشر خورشيد امان کټوازي او د ولايتي شورا غړي مبين فقير زاده وايي، چې د دغه ولايت خلکو ځکه پاڅون کړی، چې دلته ګاونډي هېواد پاکستان جګړه پيل کړې او د هېواد تاسيسات او سوداګریز ځايونه له منځه وړي.
والی ډاکتر مجيب الرحمن څمکني له پکتيکا والو مننه کوي چې په حساسو شرايطو کي د امنيتي ځواکونو ترڅنګ ودرېدل او خپله مېړانه يې وښوده.
د یادونې ده چې له تېرو څو ورځو راهیسې په یو شمېر نورو ولایتونو کې هم ورته پاڅونونه شوي دي.
Views: 194
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن