فراه (پژواک، ١٥ زمری١٤٠٠): د فراه مسوولین وایي چې د دغه ولایت د امنیه قوماندانۍ د امنیت د امر مرستیال حاجي قادر جان له څلورو ساتوونکو سره د طالبانو د کمین په ترڅ کې ووژل شو.
په فراه کې یوې باوري امنیتي سرچینې د زمري په ۱۵مه پژواک اژانس ته وویل چې تېره شپه وسله والو طالبانو له څو لوریو د فراه ښار پر امنیتي کمربند برید وکړ چې د امنیتي ځواکونو له مقاومت سره مخ شو.
د سرچینې په خبره، تېره شپه د فراه ښار د امنیتي کمربند د پولیسو یوې پوستې مرستې ته اړتیا درلوده چې د امنیت امر مرستیال حاجي قادر جان یادې پوستې ته د مرستې رسولو پرمهال له څلورو پولیسو سره د طالبانو د کمین په ترڅ کې ووژل شو.
یاده سرچینه وایي چې دغه راز تېره شپه د ښار په شمال لور کې طالبانو د ملي اردو یو بیس هم نیولی چې طالبانو او امنیتي ځواکونو ته په کې مرګ ژوبله اوښتې ده .
په همدې حال کې د فراه د ولایتي شورا رییس دادالله قانع، له څلورو ساتوونکو سره د امنیه قوماندانۍ د امنیت د مرستیال حاجي قادر جان چې د ده ورور دی، وژل کېدل مني
پژواک هڅه وکړه چې د فراه د امینه قوماندانۍ او په دغه ولایت کې د مېشتې ملي اردو د دویمې لوا نظر واخلي خو بریالی نه شو.
بلخوا وسله وال طالبان د امنیه قوماندانۍ د امنیت د مرستیال او د ملي اردو د بیس د نیولو خبرونه تاییدوي او چې لس سرتېري وژل شوی او ۱۷نور نیول شوي دي.
د یادونې ده چې د فراه ولایت له مرکز پرته ټولې ولسوالۍ د وسله والو طالبانو په لاس کې دي.
GET IN TOUCH
NEWSLETTER
SUGGEST A STORY
PAJHWOK MOBILE APP