کابل (پژواک، ۷ تله ۱۴۰۰): د امریکا مشرانو جرګې د وسله والو ځواکونو کمېټې مشر سناتور جګ ریډ وایي، د امریکا حکومت ونه شو کولای په افغانستان کې د شل کلن ماموریت پر مهال د پاکستان دوه مخې پالیسي وپېژني.
ده دا څرګندونې تېره ورځ (سه شنبې) د امریکا مشرانو جرګې د وسله والو ځواکونو کمېټې په ناسته کې وکړې.
هغه ویلي چې یوې خوا د پاکستان چارواکو له امریکایي چارواکو سره خبرې او کتنې کولې، خو په ورته وخت کې طالبان په پاکستان کې بیا منظم کېدل.
د ده په وینا، د امریکا حکومت ونه شو کړای چې په افغانستان کې د شل کلن ماموریت پر مهال د پاکستان دوه مخې پالیسي وپېژني.
هغه ویلي چې دا باید د امریکا لپاره یو درس وي او په دې خبره پوهېدل په کار دي چې پاکستان ولې او څنګه افغان طالبانو ته پټنځایونه ورکړل.
د امریکا لوی درستیز جنرال مایک مېلي هم په یاده ناسته کې ویلي چې د افغان جګړې په ارزونه کې باید د پاکستان رول او کړنو ته هم جدي کتنه وشي او امریکا باید پرېکړه وکړي چې له پاکستان سره باید څه ډول چلند وشي.
خو د پاکستان لومړي وزیر عمران خان تېره اوونۍ د ملګرو ملتونو کلنۍ غونډې ته ویلي چې دوی د افغانستان په جګړه کې ډېر ځپل شوي، ۸۰زره کسان یې وژل شوي او نړۍ باید د دوی د همکاریو ستاینه وکړي.
Views: 42
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن