پکتیکا (پژواک، ۲۱ تله ۱۴۰۰): د پکتیکا ولایت په برمل ولسوالۍ کې پر ډيورنډ فرضي کرښه په انګور اډه کې د کوچیانو سلګونه کډې او نور مسافر بند پاتې دي خو پاکستان ته د اوښتو اجاره نه ورکول کېږي.
ګڼ شمېر مسافر وايي، قانوني اسناد هم لري خو بیا هم پاکستانۍ ملېشې د تګ اجازه نه ورکوي.
خو چارواکي وايي، هڅې یې پيل کړې څو د مسافرو او ناروغانو د تګ لپاره له ټولو قانوني لارو کار واخلي.
د پکتیکا یوه اوسېدونکي احمد جاوېد پژواک خبري اژانس ته وویل، د کوچیانو شاوخوا ۶۰۰ کډې او په سلګونو نور مسافر چې ناروغان په کې دي، په انګور اډه کې بند پاتې دي.
هغه زیاته کړه، ډېری مسافر او ناروغان قانوني اسناد لري خو بیا هم د پاکستاني ملېشو له خوا د تګ اجازه نه ورکول کېږي.
د شېراحمد په نوم یو بل مسافر وايي، شاوخوا ۱۲ ورځې کېږي چې په انګور اډه کې بند پاته دی، مهاجر کارت هم لري، ډېر نور ان پاسپورټ او ویزې هم لري، خو بیا هم پاکستان نه پرېښودل کېږي.
هغه پژواک اژانس ته وویل، کورونه یې د ډیورنډ فرضي کرښې په دواړو غاړو کې دي او اړ دي چې تل تګ راتګ وکړي خو اجازه نه ورکول کېږي.
نوموړي له طالب چارواکو غوښتنه وکړه چې د دې جدي ستونزې د حل لپاره اقدام وکړي څو خلک د پخوا په څېر پر دغه لار تګ راتګ وکړي.
په انګور اډه کې د بند پاتې کسانو له ډلې سید الله چې کېنسر ناروغي لري، پژواک ته وویل: ((پاکستان ته د تګ قانوني اسنا لرم، په داسې حال کې چې سخت ناروغ هم یم خو بیا هم د تلو اجازه نه راکول کېږي.))
دی وايي، د ډېر انتظار له امله داسې حال ته رسېدلی چې د مرګ شېبې شمېري.
ده زیاته کړه، د افغانستان د نوي حکومت مسوولینو په وار وار له پاکستاني لوري سره د لارې د پرانیستل کېدو پر سر خبرې هم کړې خو کومه پایله یې نه ده ورکړې.
یوه کوچي کډوال سلطان پژواک اژانس ته وویل، هر کال د کوچیانو سلګونه کورنۍ د انګور اډې پر لار تګ راتګ کوي خو سږ کال د تګ اجازنه ورکول کېږي.
هغه زیاته کړه، څو ورځې مخکې یو ډلې مسافرو هڅه کوله، په قاچاقي لارو پاکستان ته واوړي خو د دغه هېواد ملېشو پرې ډزې کړې وې چې له امله یې یو تن وژل شوی و او مړی یې پنځلسمه ورځ پيدا شو.
نوموړی له حکومت څخه غوښتنه وکړه چې دغه ستونزه هواره کړي څو دوی اجازه تر لاسه کړي د پخوا په څېر د دواړو هېوادونو تر منځ تګ راتګ وکړي.
د انګور اډې د دروازې مسوول مولوي حاجي سیعد وویل، پر دغه لار د بار وړونکو موټرونو د تګ راتګ لپاره ستونزه نشته خو خلکو ته د تګ راتګ اجازه نه ورکول کېږي.
هغه زیاته کړه، اړوندو مسوولینو هڅې پيل کړي څو له دغه لار د خلکو د تګ راتګ لپاره هم پرانیستل شي.
د یادونې ده، په دې وروستیو کې د دې لارې ترڅنګ د سپین بولدک او تورخم لارې هم د تګ راتګ پر مخ تړل شويېچې له امله یې خلک له سختو کړاوونو سره مخامخ دي.
Views: 205
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن